Sighit mèrcuris su 17 in Lodine e giòbia su 18 de trìulas in Urtei (a pustis de s’esòrdiu de Iscanu e de sa segunda tapa in Golothene) sa serie noa de “In Tzilleri, vecchi e nuovi contesti del Canto a Tenore”. Sa rassigna sessat sa chida chi intrat: su 23 in Monti e su 26 de trìulas in Lòcula.
“In Tzilleri” est una de sas fainas programmadas in intro de “Istèrridas: Ricerca, salvaguardia e diffusione della pratica del canto a Tenore” (progetu de s’Istitutu Superiore Regionale Etnogràficu finantziadu cun fundos ministeriales de sa L. 77/2006) chi ocannu ponet in parte sos tzilleris de sas comunidades mentovadas a pustis de una prima editzione de su 2022 isparghinada in sos de Patada, Padru, Oroteddi e Durgali.
Tzilleris, est a nàrrere sos locales chi in sas comunidades nostras galu oe sunt unu puntu de addòbiu, de aunimentu e de iscàmbiu de grandu importu e chi, in su tempus, sos cantores ant impreadu comente su mègius logu de annestru.
«S’idea nostra – narat Bustianu Pilosu, coordinadore de sa Rete de su càntigu a Tenore – est sa de recuperare nessi in parte custos logos, mancari in ocasiones ispetziales, in collaboratzione cun sos tzillerajos e sas amministratziones. De custa manera custos ses addòbios propostos dae su progetu “Istèrridas” si presentant comente unu modellu, un’esempru de giudu pro totu sas comunidades, in maneras ispontànea e fintzas organizada».
In custos addòbios – totu cantos sena amplificatzione – ant a èssere registrados e filmados sena chi nemos nàrgiat a àtere ite cheret fatu e comente: una documentatzione reale de cuntestu, diferente de su totu dae sa chi, pro nàrrere, si faghet in sas fases de chirca in logos costoidos e amparados.
Cantende peri sos tzilleris, mancari in addòbios calendarizados, s’ispontaneidade est mere, nos leat a manu tenta, si faghet logu e lìberat su càntigu. Caraterìstica, custa, chi est essida a campu in totu su naturale suo in sos “comasinos” de Iscanu e in sos tzilleris de Golothene sa chida colada. Sos grupos de càntigu a tenore e sa gente lòmpida ant torradu a dare vida a cussu rituale comunitàriu chi sos deghènnios colados animaiat custos logos de importu in sa vida de sas biddas.
S’apuntamentu de Lodine de mèrcuris su 17 est in su Bar Nuraghe e in su Circolo nuovo Pablo: dae sas 20 a sas 22.30 s’ant a intreverare sos padronos de domo de su Tenore de Lodine e duos grupos de càntigu istràngios: su tenore S’Arvorinu de Orune e su tenore Antoni Milia de Orosei.
Dae sa Barbagia a sa Costera, s’in cras sa tapa est in Urtei (a sa matessi ora) intre su Bar Sport, su Bar Centrale e s’Horse’s Bar cun su tenore locale De ‘Urtei e cun òspites su Tenore Supramonte de Orgòsolo e su Tenore Garteddesu.
“In Tzilleri” at a sighire cun sas tapas finales de su 23 in Monti e de su26 in Lòcula.
«Apuntamentos periòdicos intre cantores e apassionados – agiunghet Diego Pani, responsàbile tècnicu iscientìficu de su progetu – pro istare paris e pro li torrare a su càntigu a tenore cussa funtzione sua de aunimentu sotziale, de addòbiu intre sas generatziones abertu a totu cantos, pro si manifestare e pro dare a sas levas noas sa possibilidade de imparare “sa moda” de sa bidda dae sa boghe bia de sos prus mannos e non dae sos discos o dae YouTube ebbia».
“Istèrridas” sighit su surcu sestadu dae “Modas”, progetu finantziadu dae su MIBAC cun su bandu 2018 de sa Lege N°77 a tutela de su patrimòniu immateriale Unesco, eredende·nde s’atentzione pro sa diversidade culturale e musicale e s’inclusione de custa in unu percursu de chirca globale movende dae acostiamentos diferentes: dae s’acadèmicu e de istùdiu a su chi pertocat s’ispàinu pùblicu de sos resurtados e a sa promotzione regionale, natzionale e internatzionale de su bene. In primu pianu, comente semper, sos cantores, sas fainas issoro e su contivìgiu de s’arte pròpia, ogetu de chircas, momentos performativos, laboratòrios peri sas iscolas, publicatziones e discos.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
