Sàbadu coladu, su 12 de mese de argiolas, in su Museu Mura de Aritzu, ant presentadu s’Assòtziu nou pro sa valorizatzione de sa mata de castàngia, de sa nughedda e de sa nughe de Aritzu dedicadu a “Toto Pranteddu”, turronaju e espertu cortivadore de castàngias mortu ocannu coladu.
S’assòtziu tenet sa punna de amparare, avalorare e promòvere tres de is produtos prus importantes pro s’economia e s’identidade de Aritzu – sa castàngia, sa nughedda e sa nughe – costoende is castangedos seculares e is àteras matas pro mèdiu de s’isvilupu sustenìbile e sa sinergia intre produtores, istitutziones, acadèmicos e tzitadinos.
Su cunvegnu dd’at abertu Nicola Melis, primu presidente de s’assòtziu, paris cun su Sìndigu Paolo Fontana, chi at sutaliniadu s’importu de un’initziativa chi pòmpiat a su benidore, poderende però is raighinas in su passadu. Intre is interventos acadèmicos, su de su prof. Emmanuele Farris, ordinàriu de Botànica Ambientale e Aplicada, chi at postu a notu “su ruolu essentziale de is padentes de castàngia, nughe e nughedda in sa cunservatzione de sa biodiversidade e in sa mitigatzione de su cambiamentu climàticu”.
A sighire, sunt intervènnidos Alfredo Maccioni, chircadore de s’Universidade de Tàtari, Alessandro Serra, Diretore Coldiretti Nùgoro, s’ing. Giorgio Demurtas, Presidente Coldiretti Casteddu, e Salvatore Cau, Presidente de sa Cummissione Agricultura de sa Regione Autònoma de sa Sardigna. Interessante e commovente puru su contributu de Daniele Maoddi, chi at regordadu s’acàpiu personale suo cun Aritzu e mestamente sa figura de Toto Pranteddu.
De is àteros interventos istitutzionales fintzas is de is onorèvoles Lara Serra, Franco Mula, Pietro Pittalis, de s’abogadu Sebastiano Tola e de Andrea Floris. In prus de sa presentada de s’assòtziu, su cunvegnu at bidu fintzas s’ufitzializatzione de su màrchiu territoriale nou “Orroas”, sìmbulu de sa calidade e de sa traditzione produtiva aritzesa.
Sa tapa imbeniente at a èssere sa de mese de ladàmine, cun sa de 53 editziones de sa Sagra de sa Castàngia.
Fotos Daniele Maoddi FB
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
