S’est mortu a 77 annos Sergio Frau, giornalista, sagista e iscritore chi at lassadu unu sinnu fungudu in sa dibata culturale e archeològica de is ùrtimas dècadas. Nàschidu in Roma dae una famìlia sarda, pro tempus meda aiat iscritu pro su giornale La Repubblica.
Frau at tentu su mèritu de torrare a pònnere Sardigna a su tzentru de s’istòria de su Mediterràneu e de sa tziviltade otzidentale, critichende dogmas acadèmicos cunsiderados tabù. Sa bortada fiat arribbada in su 2002 cun sa publicatzione de su sàgiu “Le Colonne d’Ercole- Un’inchiesta“, un’òpera chi aiat iscasiddadu medas polèmicas fintzas a livellu internatzionale. In cussu libru naraiat chi is famadas Colunnas de Èrcule remonadas dae Platone, in printzìpiu non s’agataiant in Gibilterra, ma in su Canale de Sitzìlia, aberende gasi a s’ipòtesi chi sa Sardigna nuràgica esseret sa mìtica Atlantide, segundu issu afundada dae un’unda manna documentàbile.
In su matessi tempus Frau aiat identificadu su pòpulu nuràgicu cun is Shardanas, is Pòpulos de su Mare chi aiant minetzadu s’Egitu Antigu, chi a bisu suo aiant fintzas un’acàpiu istrintu is Etruscos e àteras tziviltades mediterràneas. Totu ideas chi aiant partzidu sa comunidade sientìfica, ma chi aiant sotadu is istudiosos a sighire a chircare àndalas noas de istùdiu.
Su valore de is tesis suas dd’aiant reconnotu fintzas in sedes importantes: in su 2005 s’UNESCO de Parigi aiat acasagiadu unu simpòsiu e sa mustra “Atlantika: Sardaigne, Île Mythe”, mentras in su 2006 s’Accademia dei Lincei de Roma aiat dedicadu unu cunvegnu a is temas de su libru. In su 2010 aiat retzidu in Roma sa prima editzione de su Prèmiu de giornalismu L’Isola che c’è.
In su 2017 Frau aiat torradu a pònnere a pare mitu e istòria cun s’òpera “Omphalos – Il Primo Centro del Mondo. Il Paradiso che divenne Inferno”, sàgiu in ue acostagiaiat su mitu de Atlante a su nòrdicu de Amleto e de su Mulinu Còsmicu, imaginende unu “primu mundu” reguladu dae armonias pèrdidas.
Foto Nurnet- La rete dei Nuraghi
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
