‘Nosu e is atrus’, contos chi faeddant de Casteddu, de is personàgios e de s’istòria sua. Est s’argumentu printzipale de sa rassigna tzinematogràfica in programma in Casteddu, a su tzìnema Greenwich, dae su 20 de santugaine a su 3 de santandria 2021.
Sa rassigna, aparitzada dae s’assòtziu culturale Babel cun su contributu de su Comunu de Casteddu, pro tres mèrcuris de sighida a cumentzare dae is sete de merie, at a propònnere chimbe documentàrios realizados in Sardigna. Su primu apuntamentu est prevìdidu pro su 20 de santugaine cun duos documentàrios de su regista Paolo Carboni: Casteddu Sicsti, prima pellìcula fata in casteddaju, contat sa tzitade bia s’agabbu de is annos ’60. At a sighire Forasdenosus, documentàriu giradu durante s’acorru pro sa pandemia: a traessu de is immàgines de una Casteddu isbùida, donat a s’ispetadore una mirada noa de sa tzitade.
Sa segunda die, mèrcuris su 27 de ladàmine, projetziones duos filmados binchidores de su prèmiu Kentzeboghes 2019, cuncursu tzinematogràficu dedicadu a is limbas minoritàrias. Su documentàriu Bar Seui, de Andrea Deidda, faeddat de s’istòria de Armando, chi in su Pustisgherra movet dae sa bidda de Seui a Casteddu chirchende unu benidore mègius. Est su contu de unu disterru a intro de sa Sardigna etotu e de una comunidade chi in is annos est resèssida a s’afirmare in Casteddu. Non Casteddu ebbia, s’addòbiu difatis at a cumentzare cun una pellìcula chi at a batire su pùblicu a s’àteru càbudu de s’Ìsula: L’ultimo barbiere di Carrera Longa de Antonio Maciocco contat s’istòria de Gavino chi at coladu 56 annos in sa buteghedda sua de barberi in su tzentru istòricu de Tàtari.
S’ùrtima die de sa rassigna, su 3 de santandria 2021, at a èssere projetadu Madre Acqua (italianu) de Daniele Atzeni: unu longu-metràgiu subra sa vida de Sergio Atzeni, iscritore famadu de Casteddu, contada pro mèdiu de is testimonias de chie dd’at connotu. S’at a pòdere intrare in sa sala isceti cun sa carta birde, prima però tocat a cramare su nùmeru 3515589016. Sa rassigna est realizada paris cun sa Cineteca Sarda de Casteddu e cun s’assòtziu culturale Arvéschida.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
