In Quartu Sant’Aleni, in intro de sa rassigna literària “ViaConvento”, naschet s’”Ofitzina de sas limbas de minoria pro un’Europa de sos Pòpulos” cun unos cantos laboratòrios literàrios e presentadas de libros.
«Onni faeddada de sas prus pagu difusas, o idiomas de natziones sena istadu – leghimus in su situ de s’amministratzione comunale –, contribuit, in pare cun sas chi sunt ufitziales cun difusione prus manna, a veiculares sentidos de unidade in su reconnoschimentu de su plurilinguismu e de su multiculturalismu. Fiat netzessàriu unu cantieri pro amalgamare e pònnere paris su puzzle de sos idiomas diferentes in intro de una guarnissa comuna».
Est gasi chi naschet s’idea de aprontare tres dies, dae chenàbura su 22 a domìniga su 24 de santandria, dedicadas a su cunfrontu intre sos autores e sas òperas issoro «sena pèrdere s’obietivu de su pluralismu».
In programma pro custa prima editzione unas cantas propostas editoriales sitzilianas, sardas, friulanas, asturianas e aligheresas. «Nos semus ispirados – narat su sìndigu Graziano Milia – a su chi at in pessu naradu su presidente de sa Repùblica italiana Mattarella in ocasione de una bìsita in Aosta: est a nàrrere chi a nemos podimus cunsiderare comente istràngiu, in intro de un’istadu democràticu, petzi ca faeddat una limba diferente dae sa majoria. De prus, sa promotzione de sas diferèntzias linguìsticas nch’est in intro de sos printzìpios fundamentales de sa Costitutzione».
Su 22, a sas 5.30 de merie, tocat a s’iscritore sitzilianu Roberto Alajmo (in sa fotografia) cun su libru suo “Abbecedario siciliano”. Cun issu s’iscritora sarda Rossana Copez. Fatu-fatu sa presentatzione de “Il piano inclinato”, fintzas custu imprentadu dae sos de Sellerio.
Sàbadu su 23, a sas 10.30 de mangianu su cunfrontu est cun duas produtziones de Sardigna chi sos organizadores definint comente «de respiru europeu seguru», Patrizia Serra presentat s’editzione crìtica sua de su “Libellus Iudicum Turritanorum”, est a nàrrere s’istòria de sos giùighes de Torres dae sa fondatzione de su giuigadu finas a sa morte de Adelàsia in intro de una de sas mègius prosas medievales in limba sarda.
S’àtera òpera est imbetzes sa de s’aligheresu Gavino Balata “Soldats abbandonats”, unu romanzu ucrònicu iscritu in catalanu de s’Alighera. Ambos sos apuntamentos los ant a ghiare – acumpangende sos autores in sas allegas issoro – Maria Antonietta Piga e Lucia Cossu.
A merie, dae sas 4.30, cun s’agiunta de Enrico Putzolu intre s’iscuadra de sos presentadores, est sa borta de s’iscritore friulanu Gianluca Franco chi dae pagu at iscritu su romanzu suo “Une storie sole”. In pare cun issu finamentas s’iscritora asturiana Blanca Fernandez Quintana, pinna nòdida de sa literadura fantàstica in limba sua e chi contat in su currìculu suo sos prèmios Ostana su 2022 (in sas baddes Otzitanas) e Ondras 2023 (inoghe in Sardigna).
A pustis de custas presentatziones sos organizadores ant a aparitzare una mesa tunda in contu de literaduras e de polìticas linguìsticas in Europa. Ant a contare su parre issoro totu sos autores e sos moderadores interessados cun òspite de primore su poeta quartesu Antonio Pani e cun Giusy Fanti incarrigada de moderare e coordinare sas allegas de sos presentes.
Sa tres dies si serrat in domìniga, su 24, cun una resada literària cuidada dae Francesca Bellino e intitulada “Il canto libero della stella mediterranea”, a sas 18.30.
Totu sas initziativas de s’”Ofitzina de sas limbas de minoria pro un’Europa de sos Pòpulos sunt in programma in s’ex cumbentu de sos Caputzinos (in sa “sala dell’affresco della Nazione Sarda Vittoriosa”) in carrera de sas Brigata Sassari 4 in Quartu.
–
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
