Su Comunu de Loceri ringratziat totu sos partetzipantes chi ant leadu parte a custu momentu de riflessione e invitat a mantènnere arta s’atentzione e sa sensibilidade subra unu tema gasi importante, pro fraigare paris una sotziedade in ue su respetu e sa non violèntzia siant valores inviolàbiles.
Educare a su respetu: Loceri inaùgurat sos sìmbulos contra sa violèntzia, unende istudiantes e comunidades. Mèrcuris a mangianu, su Comunu at acasagiadu una tzerimònia significativa pro torrare a manifestare s’impinnu suo subra de su tema. In sa pratza de su Comunu, est istada inaugurada una banchita paris cun una targa, realizadas dae sos istudiantes de s’iscola segundària de primu gradu de Loceri in s’àmbitu de su laboratòriu “Nemos m’est meras”.
S’initziativa, frutu de sa collaboratzione intre s’Isportellu de Limba Sarda de Loceri, su Comunu de Loceri e s’Istitutu Cumprensivu “Emilia Pischedda” de Barì e sas amministratziones de Lanusè, Barì e Cardedu, at bidu sa partetzipatzione ativa de istudiantes de s’iscola segundària, dotzentes e rapresentantes istitutzionales, riunidos unu momentu de riflessione colletiva subra su tema de sa violèntzia de gènere.
A sa tzerimònia ant partetzipadu su sìndigu de Loceri, sas autoridades iscolàsticas e medas tzitadinos, totus unidos pro torrare a nàrrere chi la lutat a sa violèntzia de gènere est una prioridade cumpartzida.
“Sa violèntzia contra sas fèminas est una ferta chi corfit non petzi chie la subit, ma totu sa comunidade. – at sutaliniadu su Sìndigu de Loceri, Gianfranco Lecca – Cada gestu, cada paràula, cada atzione de sensibilizatzione est unu bucone chi contribuit a costruire una sotziedade prus giusta, in ue nemos si depet intèndere solu in cara a su dolore e a s’abusu. Comente comunidade, tenimus sa responsabilidade de educare sos fìgios nostros a su respetu e a sa compassione, pro chi sa violèntzia no agatet ispàtziu in su presente nostru e in su futuru de sas generatziones nostras. Sa banchita e sa targa chi inauguramus oe rapresentant unu sìmbulu de impinnu colletivu, un’aficu chi movet dae Loceri ma chi isperamus si potzat ammanniare prus addae de sas làcanas nostras.”
S’Isportellu Subracomunale de Loceri, in prus de tutelare sa limba e sas traditziones sardas, s’est impinnadu cun sensibilidade in una missione sotziale, ammentende s’importu de sa Cunventzione de Istanbùl comente puntu de riferimentu in sa lota a sa violèntzia de gènere. Custa Cunventzione definit sa violèntzia contra sas fèminas comente “una violatzione de sos deretos umanos e una forma de discriminatzione”, reconnoschende·la comente un’ostàculu a sa partetzipatzione prena de sas fèminas a sa vida pùblica e privada. Sa presèntzia de sa banchita e de sa targa in Loceri devenit gasi unu sìmbulu tangìbile de custu aficu, un’invitu a fàghere de su respetu sos pilastros de sa comunidade. S’initziativa faghet parte de s progetu “Dae subra de connotu a susu benidore”, finantziadu dae sa. L. 482/99 e LR 22/2018 de sa Ras, TuLis 2023
–
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
