S’unda rosa de is Pink Flamingos faghet sa torrada a Lanusè. Custa borta non pro una tapa simbòlica ebbia de su giru issoro, ma pro donare unu cascu refrigerante chi èvitat a is chi faghent tratamentos chemioteràpicos, de pèrdere is pilos.
Su machinàriu dd’ant intregadu gianteris a merie merie a s’Oncologia de s’ospidale Nostra Sennora de sa Mercede de Lanusè unas cantas rapresentantes de s’assòtziu Flamingo’s Road, ghiadu dae Cristina Concas. A retzire su donu pretziosu ddoe fiat sa diretora de is servìtzios sotziosanitàrios de s’Asl Ogiastra, Lorena Paola Urrai, in rapresentàntzia de sa diretzione aziendale e de sa diretzione de su presìdiu ospidaleri. A s’ora de s’intrega, sa dotora Urrai at donadu a is Pink Flamingos una targa de ringratziamentu a nùmene de su diretore generale Andrea Marras e de totu s’Azienda.
Su donu de sa “Genti arrùbia”, comente si faghent mutire is pitzocas de s’assòtziu, est su resurtadu de sa regorta de dinari fata dae sas voluntàrias gràtzias a unas canta initziativas chi agabbant cun sa pedalada famada chi faghet tapa in totu is Oncologias de s’Ìsula.
«Torramus gràtzias a is Pink Flamingos, ca cun s’initziativa issoro ant donadu a s’Azienda nostra unu machinàriu pretziosu a beru. – at naradu Lorena Paola Urrai – Si tratat de un’aparatu importante meda chi permitet de evitare sa ruta de is pilos a is chi faghent tratamentos chemioteràpicos, e ischimus comente pro una fèmina siat importante mantènnere feminilidade sua».
Su casco refrigerante est un’aparatu mèdicu impreadu cun is malàidos malàidos de tumore chi cunsentit de megiorare sa calidade de s’assistèntzia a is malàidos oncològicos – mescamente a is fèminas – durante sa chemioterapia. Gràtzias a s’isfritamentu controlladu de sa pedde de sa conca, si èvitat sa ruta de is pilos e si podent otènnere medas profetos a livellu psicològicu, cunsentende a su malàidu de sighire a si “reconnòschere ” e de poderare sa feminilidade sua.
