Sant’Antoni nd’at batidu s’abba: dende su tempus a sas comunidades de aprontare sos fogarones in onore suo ma intreghende·nos abba bundantziosa. Abba a livellos de còdighe ruju in contu de seguresa e de protetzione tzivile ma abba chi bi cheret (e bi nde cheret) pro prenare sas digas e pro alimentare sos serbatojos naturales in intro de sos montes in custos tempos de sicagna e de resursas ratzionadas. Ma sigomente non podimus isetare s’interventu divinu su problema abarrat istruturale.
Petzi su die in antis de su vèsperu in onore de s’abate de su fogu, duncas su 15, su presidente de su Cussìgiu de amministratzione de Abbanoa, Giuseppe Sardu, aiat naradu chi «a su presente b’at abba pro sos bator meses imbenientes ebbia». Su riferimentu fiat a sas iscortas de sos invasos de Olai e de Govossai. Pro cussu est chi, in mancàntzia de abba dae sas àeras, aiant prevìdidu sas iscetas serradas a dies bàrigas, a dinterdie, dae lunis su 27 de custu mese pro bìndighi comunes serbidos dae s’acuedotu de Janna ‘e Ferru: Nùgoro, Golothene, Fonne, Gavoi, Lei, Lodine, Mamujada, Ollollai, Onieri, Orgòsolo, Orane, Oroteddi, Otzana, Sarule e Silanos.
Su 17, su die su Santu, e duncas tudados sos fogos, Abbanoa at dadu duas comunicatziones. Una pertocat s’allerta ruja in previsione de sas temporadas annuntziadas pro sos concruos de chida: «Sos tècnicos sunt predisponende s’abertura de s’iscàrrigu de sa diga de su Govossai pro non nche barigare su livellu màssimu cunsentidu». Est a nàrrere chi, movende dae s’allarme de arriscu idrogeològicu e dae sas dispositziones de sa Protetzione tzivile, s’invasu devet èssere a tretu de acollire una cantidade manna de proa. Mancu male s’abba illiberada no est destinada a su mare ma a su potabilizadore de Janna ‘e Ferru e (pro su chi sobrat) a su Gùsana.
S’àtera in riferimentu a sa possibilidade de apostivigare sas restritziones («No amus pigadu perunu disinnu in contu de rinvios»); lunis su 20 ant a bìdere su de fàghere cunforma a su monitoràgiu de sos de Olai e Govossai.
A como duncas, s’interventu umanu (in càmbiu de su divinu bi nde diat chèrrere unu polìticu) est su de bìdere borta cun borta sos disinnos de pigare.
