Un’imàgine forte e drammàtica, sìmbulu de su dolore de sos tizviles in tempus de gherra, est istada seberada comente fotografia de s’annu dae su World Press Photo 2024. Fundadu in su 1955 in Amsterdam, su cuncursu internatzionale de fotogiornalismu prèmiat cada annu sos mègius servìtzios fotogràficos chi documentant sas acontèssidas printzipales de su mundu.
Sa fotoreporter palestinesa Samar Abù Elouf, collaboradora de su New York Times, at bintu su màssimu reconnoschimentu de fotogiornalismu gràtzias a una foto tirada a Mahmoud Ajjour, unu pipiu de Gaza abbarradu murcu a pustis de unu bombardamentu israelianu in su mese de martzu 2023. Mahmoud, 9 annos, fiat chirchende de si fuire dae un’atacu de Israele: si fiat firmadu pro isetare sos familiares suos e in cussu momentu una bomba dd’aiat boddidu in prenu, seghende·li sos bratzos.
Mahmoud est unu de sos medas pipios chi cada die abbarrant istrupiados o mortos in Gaza. Segundu sos datos de sas Natziones Unidas, in su mese de nadale 2024 sa Fràngia de Gaza aiat su primadu mundiale pro su nùmeru prus artu de amputatziones infantiles cunforma a sa populatzione. E sos nùmeros publicados dae s’Unicef su 31 de martzu sunt galu prus drammàticos: dae su printzìpiu de sa gherra cumintzada in su mese de santugaine 2023, a pustis de sos atacos de Hamàs, sunt mortos prus de 15.000 pipios palestinesos, prus de 34.000 sunt abbarrados fertos e prus de unu millione ant dèvidu lassare sas domos issoro.
Sa fotografia, fata in santandria 2023, mustrat a Mahmoud chi pòmpiat sa ventana posta foras de campu: una cannada de lughe l’illùminat sa cara e sa carena istrìghile sua sena bratzos. Custa una de sas motivatziones ufitziales de giuria de su World Press Photo: «sa fotografia andat prus addae de su sìngulu eventu e devenit un’icona universale de sa tribulia infantile in sas zonas de gherra».
Originària de Gaza, Samar Abù Elouf at traballadu medas annos in primu lìnia, documentende sa vida e sas cunsighèntzias de sas gherras. Issa puru at dèvidu lassare Gaza e como istat in Qatàr, in su matessi palàtziu in ue est acasagiada sa famìlia de Mahmoud. Inoghe, su pipiu – unu de sos pagos pitzinnos palestinesos feridos de gherra chi ant pòdidu retzire curas adecuadas – a bellu a bellu est imparende a iscrìere, a giogare cun su tzellulare e a abèrrere sas ghennas impreende sos pees ebbia. Su bisu prus mannu suo est de resèssere una die a tènnere sas pròtesis.
Samar Abù Elouf at contadu chi sa mama de su pipiu l’at cunfidadu chi unu de sos momentos prus tristos est istadu cando Mahmoud at cumpresu de àere pèrdidu sos bratzos, e sa primu cosa chi l’at dimandadu est istada: «Comente apo a fàghere a t’abbratzare como?».
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
