Non prus pratza, iscolas o brucons de monte, in su 2026 Sa Die de sa Sardigna si tzelebrat fintzas a suta de s’abba. In su programa de is initziativas, is firmadas de su caminu de sa Sarda Rivolutzione, cuncordadu dae Assemblea Natzionale Sarda, presentant un’addòbiu originale e diferente dae is chi Ans at costumadu a abrintare in is annos colados.
Sa bandera de sa Sardigna, chi semus avesos a bìdere in is cùcuros e in is logos prus a craru, custa bia calat a suta de abba. Domìnigu su 19 de abrile 2026, a ora de is 10:30, in Gonone, duas sòtzias de sa truma de Sa Die de Ans chi faghent impojada, s’ant a imbèrghere cun sa bandera sarda, donende forma a “Sardas fintz’a fundu”. S’atzione cunsistet in un’impojada simbòlica cun sa bandera, documentada e mustrada fintzas dae foras. Unu piticu gestu ma prenu de significu, chi traballat in duos livellos: dae un’ala sa pràtica de is isport acuàticos, dae s’àtera su valore ambientale, culturale e sotziale de su mundu a suta de s’abba.
Si fatu·fatu Sa Die est tzelebrada in logos simbòlicos “artos”, custa borta su messàgiu movet conca a giosso. Cando si narat chi Sa Die est a dda bìvere a petotu, bolimus nàrrere in manera cuncreta chi est in totue: fintzas in su fundu de mare, chi mare.
Su sèberu de Gonone no est de badas. Su logu est unu puntu de cuntatu tra comunidade, turismu e ambiente, in ue su mare est parte de fundamentu de sa vida fitiana e de s’economia locale. Est inoghe chi s’initziativa leat significadu suo prus fungudu, insertende·si in unu cuntestu acanta su paesàgiu marinu est parte integrante de s’identidade territoriale.
In su cuadru de su calendàriu 2026, chi traessat limbas e ispàtzios diferentes in totu sa Sardigna e fintzas foras, custa atzione introduit una dimensione pagu contada: sa de is paesàgios a suta de s’abba. “Sardas fintz’a fundu” si movet in unu registru asciutu, ma aberret una possibilidade noa: incroire fintzas su chi, de solitu, abarrat foras de campu cando si contant is dies prus importantes de s’ìsula.
Una mòvida simbòlicu, ma evocativa meda, pro subènnere chi s’identidade sarda est sena de làcanas.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
