Unu sistema tecnològicu nou po castiai s’ambienti e prevenni is fogus in is sartus e in is padentis. Su progetu si narat Avix e sa sperimentatzioni incumentzat propiu de Punta Molentis, su logu chi s’istadi colada at pigau fogu. Custa initziativa nàscit de sa collaboratzioni tra s’Universidadi de Casteddu, sa sotziedadi Alarm System e sa I.T. Euromedia.
Su nòmini Avix est s’acrònimu de “Piattaforma Intelligente per il Controllo di Veicoli Autonomi”. Est unu sistema avantzau chi ponit impari sensoris, dronis e modellus matemàticus po gestiri mellus is emergèntzias in su territóriu. Su sistema imperat un’arretza de tecnologias chi traballant totus impari. Nci funt sensoris chi consumant pagu meda e chi no tenint bisòngiu de manutentzioni. Impari a custus, nci funt telecàmeras òticas e a infrarrùbius e una truma de dronis chi podint castiai is zonas prus a arriscu movendi-sì de una parti a s’àtra.
Totu is datus chi s’arregollint benint elaboraus de modellus preditivus chi podint identificai luegu is primas framas e calculai aundi su fogu podit andai sighendi su bentu. In sa presentatzioni, is espertus ant spricau ca cust’aina est de importu mannu po sa Sardigna, unu logu chi dònnia annu est in perìgulu po is fogus. S’iscopu printzipali est de donai a chini depit traballai in is emergèntzias is ainas giustas po fai interventus lestrus. Cun s’unioni de totu custas tecnologias si bolit cambiai sa manera de fai preventzioni.
Su progetu Avix est stétiu finantziau cun prus de 4,8 milionis de eurus de su Ministeru de is impresas e de su Made in Italy. Custa initziativa fait parti puru de is programmas de sa prataforma europea Step po su svilupu de tecnologias de importu mannu.
