B’at àpidu abbolotu mannu custa chida pro sa lòmpida de Emanuele Filiberto de Savoia a s’editzione de ocannu de sa Cavalcada sarda, in programma pro domìniga su 18 de maju. A su fìgiu de Vittorio Emanuele e de Marina Doria l’aiant invitadu sos de sa delegatzione sarda de sos òrdines dinàsticos rapresentada dae Massimiliano Manca de Mores. In programma fintzas un’initziativa in s’Universidade cun su retore Gavino Mariotti.
S’initziativa fiat organizada dae s’assòtziu internatzionale de sos òrdines dinàsticos mentovados de sa Casa Savoia: un’eventu de benefitzèntzia de cussos chi agradant meda a sa nobiltade ritza o derruta chi siat. Ma a concruos de totu custu eventu resurtat annulladu. Mancari custu su nebode de s’ùrtimu re de Itàlia (Umberto II) sa passigiada sua tataresa si l’at fata; posca sa partetzipatzione a una chena benefit e fatu fatu s’aèreu pro non si pèrdere non sa Calvalcada ma sa missa de su paba nou. Ma est beru finamentas chi sa Cavalcada, eventu folclorìsticu chi petzi sa galania de sos costùmenes mustrat e nudda de prus, est un’eventu “reale”, de cussos chi pròpiu cun sos Savoia andant a manu tenta.
A bisu de s’iscritore Enrico Costa, sa prima editzione de sa Cavalcada est de su 1711, cando su Cussìgiu comunale delibereit de dare omenàgiu a su re Filipu V de Ispagna. Ma sa manifestazione chi, pagu prus o mancu a sa chi bidimus oe, naschet in forma ufitziale su 1889 in ocasione de sa lòmpida de su re Umberto I acumpangiadu dae sa mugere Margherita de Savoia, lòmpidos a sa tzitade pro s’inauguratzione de su monumentu a Vittorio Emanuele II. Bi pigheint parte tremìgia persones, bestidas cun pìngios de sa traditzione sarda persone, de sas biddas de sa provìntzia de Tàtari.
Fintzas in sas editziones de su 1929 e de su 1939, in època fascista, bengeint a Tàtari esponentes de sa casa regnante. Est una manifestatzione chi rapresentat sa Sardigna?
–
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
