Benint dae Ispagna e como nche sunt in Crastatza, in tretos de Bitzi. E si nch’annanghent a s’àteru abbilastru lòmpidu dae Sitzìlia. Dae inoghe a unu mese àbbilas de Bonelli ant a pòdere bolare in sas àeras nostras.
Una nova de grandu importu pro is amantiosos de sas aes chi nch’est in intro de su progetu de cooperatzione Life Abilas chi comintzat su mese de santugaine de s’annu coladu, cando fiant comintzadas sas atividades finantziadas dae s’Ue aprontadas dae s’agentzia Forestas in pare cun s’Ispra, s’assessoradu regionale de s’Amparu de s’ambiente, E-Distribuzione e sa Ong ispagnola Grefa. Totu cun sa collaboratzione de su Corpus forestale e de su Parcu naturale de Tepilora.
Su programma punnat a afortire sa torrada de custu pugione a pustis chi, in cabudanni de su 2022, fiat finidu su progetu internatzionale pretzedente Aquila a-Life (faina chi aiat impignadu unos cantos entes e organismos ispagnolos, frantzesos e italianos illiberende 32 aes giòvanas).
«Su de àere seberadu su territòriu nostru de su parcu – at naradu su presidente de s’ente Martino Sanna – mustrat cantu s’àrea de Tepilora est importante in contu de gestione de sa biodiversidade animale in Sardigna». A bisu de Elisabetta Raganella Pelliccioni, tecnologa de s’Ispra, «custa de Bitzi est una tapa de grandu importu pro su progetu e sos resurtados otènnidos sunt in lìnia cun sas esperièntzias coladas pro torrare a introduire sas àbbilas dae s’Ispagna».
Gosu mannu finamentas dae su responsàbile de su setore Biodiversidade de s’agentzia Forestas: «Sighimus a garantire s’agiudu netzessàriu cun sas professionales presentes intre su personale in sos interventos pro sa cunservatzione de sa biodiversidade e s’introdutzione a nou de sas chi fiant entidades biològicas isparèssidas, comente s’àbbila de Bonelli».
–
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
