Lunis 22 de làmpadas in su Teatru Adriano de Casteddu in sa ruga Tàtari ddoe at a essi un’atobiu nou de sa de ses editzionis de sa rassigna de cìnema “Nosu e is Atrus”. Custu eventu fait parti de is atividadis culturalis de su Prèmiu Kentzeboghes chi serbit pròpiu po promovi is film fatus in is lìnguas de minoria.
Ant a proietai is cortometràgius fatus in is laboratòrius de is iscolas. A is ses de merì ant a cumentzai is proietzionis cun su film “Da Is Gnogno Saurs Sa Dieta de Bombo”. Dd’ant fatu is scolarus de sa s’iscola elementari de s’Istitutu “N. 1-2” de Sìnnia.
A pustis, a is seti de merì, ant a donai su cortometràgiu “Il Caso Argentina – Parte Seconda”. Custu est su traballu fatu de is istudiantis de sa de duas B de s’iscola mèdia de s’Istitutu 1-2 “A. La Marmora” de Pauli.
A is otu de ant a acabai is proietzionis cun su film “La Sala d’Attesa”. Custu progetu dd’ant fatu totu is iscolarus de su Cpia 1 de Casteddu, chi stùdiant in sa sede de Cuartu Sant’Aleni.
Intre de unu film e s’àteru, nci at a essi su tempus po fueddai e arrexonai asuba de chistionis de importu. Ant a fueddai Paolo Carboni, diretori artìsticu de sa rassegna e de su prèmiu Kentzeboghes, e Daniele Arca, espertu de laboratòrius e de cìnema. Impari a issus ant a fueddai fintzas is presidis e is maistrus de is classis, po spiegai su valori educativu de custa faina.
Su diretori artìsticu Paolo Carboni narat chi “traballai cun is scolas est una de is cosas prus importantis po s’assòtziu Babel. Su 22 de làmpadas s’at a presentai su traballu de is scolarus chi ant pigau parti a is laboratòrius a indonu fatus in scola”. Custa faina dda faint de annus in totu sa Sardigna: “Custu si podit fai gràtzias a sa lìngua de su cìnema e a is maistrus e presidis chi creint meda in s’importàntzia de imparai passendi po su cìnema”.
S’organizatzioni arregordat chi s’intrada a su Teatru Adriano est feti po is scolarus, is maistrus e is genidoris de is piciocus chi ant pigau parti a is laboratòrius. S’eventu est possìbili gràtzias a s’Assòtziu Culturali Babel e a su Prèmiu Kentzeboghes. Ant agiudau puru sa Regioni Autònoma de Sardigna, sa Fondatzioni de Sardigna e sa Sotziedadi Umanitària Tzineteca Sarda.
