Cun duos votos a majoria, martis coladu su Cunsìgiu regionale de sa Sardigna at aprovadu duas motziones de grandu importu polìticu: su refudu de su riarmu europeu e una proposta de tàsiada de is raportos istitutzionales cun Israele pro is violatziones de is diritos umanos e e de su diritu internatzionale in Palestina.
Sa primu motzione, firmada dae Luca Pizzuto (Sinistra Futura), cundennat su pranu europeu “ReArm Europe/Readiness 2030”, definidu comente a un’esèmpiu de “economia de gherra” chi chitat dinare a sa sanidade, a s’iscola e a su sotziale. Su documentu impinnat sa presidenta Maria Solinas e sa Giunta a cunfirmare su refudu issoro in is cunfrontos de su riarmu, a promòvere unu pianu regionale de paghe europeu, e a sustentare polìticas pùblicas pro is disamparados e is pòpulos chi si fuent dae is gherras.
Su cunsìgiu però no at votadu a s’unanimididade: in sa majoria, su Partidu Democràticu s’est astènnidu e Fratelli d’Italia at votadu contra, mentras su tzentrudereta at presentadu una motzione vicànica, refudada, chi puntaiat a sustentare “cada tentativu de negotziadu” intre Israele e Palestina .
Sa segunda motzione, fintzas custa cun Pizzuto primu firmatàriu, denùntziat is “violatziones sistemàticas de is deretos umanos pro manu de s’Istadu de Israele” in sa Fràngia de Gaza. Sa proposta impinnat sa Regione a firmare cada collaboratzione istitutzionale, iscàmbiu o progetu cun Israele; sollètzitat sa Giunta a promòvere initziativas pro sessare su fogu in manera contina e cunferèntzia de paghe in su Mediterràneu, proponende sa candidadura de sa Sardigna comente sede.
Segundu Valdo Di Nolfo (Uniti per Todde), sa motzione est un’atu de “responsabilidade e tziviltade” e un’invitu a su Guvernu natzionale a s’ischierare cun detzisione: «Sa Sardigna no at a èssere iscrava de s’economia de su genotzìdiu». Su documentu remonat is prus de 60.000 vìtimas palestinesas in sa Fràngia de Gaza e is protzedimentos in de Corte Internatzionale de Giustìtzia e de sa Corte Penale Internatzionale pro possìbiles crìmines de gherra.
Su Movimentu 5 Isteddos at definidu su votu “unu singiale forte pro torrare a cunsiderare sa bèndida de armas a Israele e is relatziones cun Istados chi non rispetant is deretos umanos”. A s’imbesse, su tzentrudereta at incurpadu sa majoria de trasformare su Cunsìgiu regionale in unu “parlamentu internatzionale”, sena cumpetèntzia in contu de polìtica èstera.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
