Candelas in manu pro ammentare sa morte e sos dannos chi at creadu sa próina manna de su 2013, in Terranoa. Sunt passados ses annos de cussa die disgratziada de su 18 de su mese de santandria: a sa fine si sunt contadas 19 vìtimas e dannos pro meda milliones de èuros.
Una fiacolada pro regordare, ma fintzas pro pensare a s’imbeniente e fàghere de manera chi custas tragèdias non si repitant prus. In cussas “bias de su ludu”, aici dda sa lamant is terranoesos, at a èssere fatu unu corteu mudu. S’atòbiu est stètiu fissadu pro sas 20.30, in cara a sa crèsia de Sant’Antiogu.
Terranoa, cussu 18 de santandria, at pagadu su prètziu prus artu de su passàgiu de su tziclone Cleopatra. Su Cussìgiu cumonale at a ammentare sa die prus trista de sa comunidade de Terranoa cun unu minutu de mudìmene.
Ma cussu lunis est istada picicada totu sa Sardigna: 19 sos mortos provocadas dae s’alluvione, 13 sunt cuntzentradas in su nord de s’Isula. Altzaghena at giai ammentadu sas bator vìtimas suas cun una tzerimònia in pratza de XVIII Santandrias, a sa presèntzia de su sìndigu Robertu Ragnedda.
Su disastru no aiat risparmiadu nemmancu su Nugoresu e s’Aristanesu semenende mortos in Torpè, Nùgoro, Guasila, Uras, Bitzi. Vidas umanas truncadas, ma fintzas disacatos a impresas e campos cun deghinas de imprendidores e massajos in ghenugru pro more de su tziclone.
