Su longumetràgiu “L’Ultimo Centenario” de su regista Pietro Mereu est èssere disponìbile a in donu in sa prataforma MyCulture+, unu giassu dedicadu a sa promotzione de su tzìnema chi esplorat e avalorat sas limbas e sas culturas minoritàrias.
Su film, chi at a èssere a disponimentu cun sutatìtulos in inglesu, de custa manera donat sa possibilidade a unu pùblicu internatzionale de iscobèrrere un’istòria chi aunit cultura, traditzione e riflessione profunda, imbèrghida in sa Sardigna, una de sas “Zonas Blu” prus famadas de su mundu, nòdida pro sa longevidade de sos abitantes suos.
“L’Ultimo Centenario” sighit sos fatos de una giornalista, interpretada dae Carlotta Dessì, chi arribbat a Baunei, in Ogiastra, bidda rica de traditziones e nòdida pro sa longevidade de sos abitantes suos. Sa protagonista est in sa chirca de s’ùrtimu tzentenàriu galu in vida, ma su biàgiu suo si dùrriat in un’addòbiu cun una veridade chi at a cambiare sa bisione sua de sa vida e de sa morte. Giradu in su coro de sa Sardigna, su film presentat unu retratu de sa cultura locale, de sa vida de ogna die in Baunei e de sa connessione de sos betzos cun sa terra.
Sa produtzione, realizada dae Ilex Production cun su sustennu de sa Fundatzione Sardegna Film Commission e de s’Assessoradu a su Turismu de sa Regione Sardigna, tzèlebrat sa longevidade e in prus est unu donu a sa bellesa de una comunidade chi bivet respetende sa natura. Sas ripresas ant interessadu sa populatzione locale, mescamente sos betzos, chi cun contos e istòrias ant arrichidu sa narratzione.
Su regista Pietro Mereu at seberadu de dedicare custu progetu a sa memòria de Carlotta Dessì e de Gianni Cannas. Mereu at chertu fàghere de “L’Ultimo Centenario” siat comente tributu a sa longevidade e a sa traditzione, siat comente donu cummòvidu a sa carriera e a s’eredade de duos protagonistas fundamentales de su tzìnema sardu. Su regista at sutaliniadu chi su film non tzèlebrat petzi sa bellesa de sa vida, ma fintzas s’influèntzia durajola de Dessì e Cannas, chi ant contribuidu a formare sa cultura tzinematogràfica de s’ìsula.
Sos ispetadores ant a pòdere atzèdere a in donu a su film registrende·si in sa prataforma MyCulture+ (myculture.plus), in ue ant a agatare s’oportunidade de s’imbèrghere in sas traditziones de sa Sardigna e de riflètere subra sas temàticas esistentziales profundas tratadas in su film. Un’ocasione ùnica pro bìvere un’esperièntzia tzinematogràfica chi afundat sas raighinas in sa cultura, in s’istòria e in s’ispiritualidade de una terra ispantosa.
–
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
