S’Auditòrium “Giovanni Lilliu” de su Museu de su Costùmene acasàgiat pro duas dies su cunvegnu internatzionale “Sardigna – Còrsica – Friûl. Fainas pro s’amparu de sas limbas nostras. Dae sas limbas faveddadas a is sistemas literàrios”, promòvidu dae s’Istitutu Superiore Regionale Etnogràficu (ISRE). Un’addòbiu chi at a pònnere a pare linguistas, iscritores, operadores culturales e rapresentantes istitutzionales cun sa punna de chistionare de istrategias cumpartzidas pro s’amparu e sa promotzione de is limbas ereditàrias de su Mediterràneu e de s’àrea alpina.
S’initziativa naschet dae su bisòngiu de pònnere faghe a pare tres realidades linguìsticas chi, mancari tèngiant cunditziones normativas e polìticas diferentes, cumpartzint disafios comunos: su sardu e su friulanu – tutelados dae sa Lege 482/1999 – e su cossu, limba serente a su sardu pro istòria e istrutura, ma insertada in su cuntestu giurìdicu frantzesu. Su programa previdet unu tretu mannu dedicadu a s’istùdiu de is polìticas linguìsticas, a is sistemas de tzertificatzione de is cumpetèntzias, a is pràticas iscolàsticas e a su ruolu de is mèdios de comunicatzione in s’ispàinu de is limbas minoritàrias.
Lunis su 24 de onniasantu, is traballos cumentzant a ora de is 14:30 cun is saludos de su presidente de s’ISRE, Istèvene Lavra, e sighint cun is interventos istitutzionales de Franciscu Sedda e Antonello Pellegrino in contu de polìticas regionales pro is limbas de Sardigna. A pustis, est prevìdida una sessione dedicada a is fundamentos sientìficos de s’amparu linguìsticu, cun contributos de is linguistas Michele Loporcaro, Elisa Manca, Simone Ciccolone e Gabriele Zanello.
A merie Marina Branca e Rosangela Lai ant a allegare de sa situatzione de is limbas cossa e sarda, mentras Riccardo Mura at a aprofundire su raportu intre is identidades linguìsticas de is àreas intre Sardigna e Còrsica. Sa sessione s’at a serrare cun sa presentada de unu progetu de chirca chi pertocat sa memòria linguìstica de is disterrados italianos e frantzesos, contivigiadu dae Piergiorgio Mura e Simone Pisano.
Sa die in fatu, su 25 de onniasantu, su mangianu at a èssere dedicadu a is sistemas literàrios: Dino Manca, Marina Branca, Salvatore Tola, Anna Bogaro e Manuelle Mureddu presentant unu cuadru articuladu de is traditziones literàrias sarda, cossa e friulana. Una parte de sa sessione est intregada a is iscolas de su logu, chi ant a intervènnere cun leturas poèticas e riflessiones, e a s’agabbu s’at a ammentare a Tonino Ledda, fundadore de su Prèmiu Otieri.
A merie su tema at a èssere su de sa presèntzia de is limbas minoritàrias in su mundu de s’informatzione e de sa comunicatzione. Giornalistas e operadores de is mèdios de comunicatzione – comente Tonio Pillonca, Maria Antonietta Piga e Luciano Piras – rejonant de su ruolu de s’imprenta e de sa televisione in sa normalizatzione linguìstica. A sighire, una mesa de rejonu chi at a pertocare s’iscola, s’universidade e sa sotziedade, contivigiada dae dotzentes comente Marie-Ange Mazzoni, Carla Valentino, Andrea Luxoro, Gabriele Zanello e Simone Pisano.
A ora de is 17.00, serrat is traballos cun is cunsideros de agabbu a incuru de su presidente de s’ISRE, Istèvene Lavra.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
