Traballos in su presone de Badu ‘e Carros pro ddoe pònnere cundennados cun su 41bis duncas pruschetotu mafiosos. Est su chi timet sa presidente de sa Regione Sardigna Alessandra Todde chi collit su pensamentu espressadu dae su pìscamu de Nùgoro, Antonello Mura.
“Como no est petzi un’ipòtesi – narat Todde – si cunfirmadu at a èssere un’isceberu grae meda pro sa tzitade e pro su territòriu etotu. Un’interventu chi non tenet in contu de su parre de sa Regione”.
Todde sutalìniat su tentativu fatu cun su Guvernu: “Su tres de Nadale apo iscritu a sa presidente Giorgia Meloni protestende contra su trasferimentu a Sardigna de unu numeru mannu de detenudos cun su 41-bis. In cambiu no apo retzidu peruna respusta. In prus prima aia dimandadu a su ministru de sa Giustitzia de abèrrere unu cunfruntu chi tempus faghet aiat garantidu e como nono”. E pro custu sa presidente de sa Regione narat finas chi dd’ant acusada de fàghere allarmismu pro de badas.
Intrende in su coro de sa chistione, Todde est firma: “No est possìbile chi unu càrtzere interu siat destinadu isceti pro custu regìmene, ponende aici in Sardigna totus is arriscos chi ant a gravare in sas comunidades de su logu”. In fines un’apellu a sos parlamentares sardos in Roma pro intervènnere cun su guvernu natzionale.
