In 58 annos de vida si nd’at fatu belle 33 in intro. A Beniamino Zuncheddu de Brucei l’aiant dadu s’ergàstolu a pustis de sas acontèssidas de Sìnnia de s’8 de ghennàrgiu de su 1991. Tando ochieint a tres pastores: Gesuino Fadda, 56 annos, su fìgiu Giuseppe, de 24 (ambos duos propietàrios de su cuile e de sa roba) e su tzeracu issoro Ignazio Puxeddu, de 55. A su ghènneru de Fadda, Luigi Pinna de 29 annos, lu fereint ebbia.
Sos investigadores, tando, sebereint sa caminera prus curtza movende dae sas brigas lacanàrgias intre sos Fadda e sos Zuncheddos. Fintzas ca sos meses in antis b’aiat àpidu bèstias mortas, canes apicados, chertos e minetzas. Cunforma a s’acusa, su mortore nche tzucheit a cuile a caddu de una Vespa iscudende unu primu corfu a Gesuino Fadda e fatu fatu a sos àteros. Arresteint a Beniamino Zuncheddu chi tando teniat 27 annos ebbia e nemmancu un’àlibi in favore suo.
Unos chimbanta dies a pustis de s’acontèssida, Luigi Pinna, inditeit a Zuncheddu comente mortore, mancari in antis non resesseit a nàrrere chie podiat èssere ca nat chi fiat caratzadu. Dae tando galera in Badu ’e Carros, Bonu Caminu e Uta prus chi non bardiadu, iscontende sa pena màssima. Petzi dae pagu fiat in semilibertade, traballende a die in foras e torrende·nche a intro a de note.
A pustis de 29 annos de presonia s’abogadu suo Mauro Trogu at otènnidu dae sa procuradora generale de Casteddu Francesca Nanni – e non fiat cosa fàtzile – sa possibilidade de unu protzessu de revisione pro àere proas noas in favore de sa tesi de Zuncheddu innotzente. Custu protzessu at bortuladu su casteddu de acusas contra a sa persone impresonada, posta in intro pro un’errore giuditziàriu comente medas àteras bortas acontesset.
E in s’udièntzia de su 14 de santandria de s’annu in pessu coladu Pinna at naradu chi tando unu politzoto li mustreit una foto identikit de Zuncheddu in antis de su porrogu. Su protzessu no est galu cumpridu ma como Zuncheddu est lìberu. Ma 58 annos de vida si nd’at fatu belle 33 in intro. Innotzente.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
