Non sunt bonos pro nudda sos datos de su 2023 in contu de rinùntzia a sas curas dae parte de sos tzitadinos de una Repùblica chi, cunforma a s’artìculu 32, diat dèvere tutelare sa salude comente diritu individuale e comente interesse colletivu. Su report chi sa Fondazione Gimbe at presentadu in s’addòbiu annuale de su Osservatorio Nazionale Welfare & Salute ponet sa terra nostra comente prima de s’istadu cun 13,7 puntos pertzentuales. Barigada (+6,1%) sa mèdia italiana de su 7,6% in pare cun àteras regiones: oto intre su 10,5% de su Làtziu e su 7,8% de sa Ligùria. Su gràficu – che chi non bastarent sas tzifras – est tremendu e nos mustrat unu divàriu mannu fintzas cunforma a sa regione in segunda positzione.
In totu Itàlia sunt belle bator milliones e mesu sos chi, sighende sas definitziones Istat, ant decraradu de àere rinuntziadu a bìsitas ispetzialìsticas o esames diagnòsticos pro unu o prus motivos: problemas econòmicos (impossibilidade de pagare, costos graes), dificultade de atzessu (istrutura a tesu, mancàntzia de trasportos, oràrios pagu dèghidos), tempos de isetu prus chi non longos. Si sa Sardigna tenet su peus datu cheret nàrrere chi custos motivos sunt amplificados e faghent de custa terra un’ìsula pagu ditzosa in tèrmines sanitàrios.
Su raportu Gimbe narat chi su fenòmenu presentat diferèntzias modestas intre sas àreas geogràficas. Pro nàrrere, in suta de sa mèdia “natzionale” b’at regiones meridionales comente sa Calàbria (7,3%), sa Sitzìlia (7%), sa Basilicada (6,7%) e sa Campània (5,9%). Sa mèdia de custas regiones de su mesudie est de su 6,7%. Fintzas si sa natzione nostra non nch’est in intro de s’Itàlia meridionale, sos sardos chi rinùntziant sunt su dòpiu de sos tzitadinos de custas terras de su sud. Unu disacatu chi cheret postu a comintzu de cale si siat allega sanitària chi però, dae una Giunta a s’àtera, non diat pàrrere proponende·nos solutziones.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
