Su protzessu a su cardinale Giovanni Angelo Becciu torrat a su tzentru de s’atentzione a pustis de sa detzisione de sa Corte de Apellu de su Tzitade de su Vaticanu de considerare in parte non bàlidu su primu gradu e de dispònnere unu dibatimentu nou. Una bortada importante, chi at a fàghere allegare meda e chi torrat a abèrrere unu de is casos giuditziàrios prus de importu de is ùrtimos annos pro sa Santa Sede.
Sa Corte difatis at decraradu sa “nullidade relativa” de su protzedimentu, reconnoschende sa presèntzia de errores protzedurales. Custu bolet nàrrere chi su protzessu no est burradu de su totu, ma ca unas cantas partes suas s’ant a dèpere torrare a fàghere pro garantire su prenu deretu a sa difesa. S’udièntzia de su dibatimentu nou, pro istabilire su calendàriu de is traballos, est atatzada pro su 22 de mese de làmpadas.
Sa detzisione no iscassat totu totu sa sentèntzia emìtida su 16 de nadale 2023, chi aiat cundennadu a Becciu a chimbe annos e ses meses de reclusione, in prus de s’interditzione de is pùblicos ufìtzios e a una contraventzione. Però, benit suspèndidos is efetos in unos cantos coladòrgios fundamentales, imponende una revisione de is fases cunsideradas irregulares.
A fundamentu de su providimentu de is giùighes ddoe tenet prus che totu problemas acapiados a sa gestione de is atos protzessuales. In particulare, in su primu protzessu non diant èssere istados depositados in modu cumpletu o atzessìbile totu is documentos. Custu diat àere limitadu su traballu de is abogados de sa difesa, impedende·ddis de esaminare totu is proas. Dae inoghe sa netzessidade de torrare a abèrrere su dibatimentu, ascurtare testimòngios noos e valutare torra parte de su materiale.
Su protzessu pertocat sa gestione de is fundos de sa Segreteria de Istadu vaticana e, in modu prus pretzisu s’achistu de unu palatzu in Londra, in Sloane Avenue, pro unu valore de unos 230 milliones de isterlinas. S’operatzione diat àere causadu pèrdidas mannas meda a is càscias de sa Santa Sede. In prus de Becciu, sunt interessados fintzas su finantzieris Raffaele Mincione, su mediadore Gianluigi Torzi e sa consulente Cecilia Marogna, imputados a vàriu tìtulu de reatos finantziàrios.
Pro medas osservadores custu est su protzessu finantziàriu prus importante mai tzelebradu in Vaticanu, chi in prus de s’àteru est fintzas unu pretzedente istòricu. Difatis Becciu est su primu cardinale in s’istòria cuntemporànea giudicadu dae unu tribunale penale vaticanu, in intro de su percursu de trasparèntzia inghitzadu dae Paba Frantziscu.
Sa difesa de Becciu, chi dae meda denuntziaiat irregularidade in sa gestione de is atos, at retzidu cun praghere mannu sa detzisione de sa Corte. Fintzas unas cantas boghes de su mundu eclesiàsticu ant cummentadu sa bortada. Su pìscamu de Otieri, Corrado Melis, at faeddadu de sa netzessidade de “acrarire totu is fatos”, ponende a notu comente custa noa potzat donare a su protzessu prus echilìbriu e trasparèntzia.
Immoe s’aberit una fase noa de su protzedimentu. Is giùighes ant a dèpere torrare a esaminare proas e testimonias, cun sa probabilidade cambiare s’èsitu finale de su protzessu: cunfirma de sa cundenna o una possìbile modìfica.
Su fatu, in prus, rapresentat fintzas una proa pro sa credibilidade de su sistema giuditziàriu vaticanu. Su reconnoschimentu de is errores protzedurales, fidatis, evidèntziat sa cumplessidade de unu protzessu chi aunit a pare deretu, finàntzia e diplomatzia, a suta is ogros de s’opinione pùblica internatzionale.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
