Sighi∙nos

Salude, ite ses chirchende?

Atualidade

Primu de Maju, in La Caletta su de chimbe CalaBeer (and Wine)

S’assòtziu Kawham organizat una die intrea cun birrifìtzios, cantinas, artesanos, assòtzios, musica meda e unu cunvegnu in contu de traballu.

Sas traditziones chi ponent raighinas sunt sas chi, annu cun annu, permitint de indiritzare mègius sa mirada a fundu e a largu. In sa Marina de Thiniscole (La Caletta) torrat duncas una manifestatzione chi in calendàriu est marcada su primu de maju e chi, in custu 2024, lompet a sa de chimbe editziones. Cun una novidade giai movende dae su nùmene. Ca su chi finas a eris fiat su Calabeer, como at a èssere su Calabeer and Wine, ideadu e progetadu dae s’assòtziu culturale Kawham.
No una festa de sa birra cale si siat, ma un’apuntamentu ue sos birrifìtzios artesanales minudos s’aunint che a semper a àteras realidades artìsticas e assotziativas de su logu. E como, difatis, a sas cantinas. «Dae tempus est – narant sos de Kawham – chi fìamus pensende a pònnere in parte su mundu de sos binos pro arrichire e nobilitare sa manifestatzione».
Totu at a comintzare a banda de mangianu, dae sas 10, dae sa pratza de su Portu finas a sa rugrada intre sas carreras de Nazario Sauro e de Ancona, est a nàrrere sas prus de importu de sa localidade marina nòdida. Ses sos stand chi amus a agatare manu-manu: Triulada, Arabus Beer, Centoteste, Zemyna, Santu Jorgi, Birrificio agricolo Reforte.
Custas postatziones s’ant a intreverare cun òrdine regulare in pare a sas de sas realidades vinìculas Sassu, Binza ‘e su Re, Cantina Giacu, Cantina Giovanni Ladu e Cantina Sorres. Cun issos fintzas unos cantos puntos espositivos: s’impreu a nou, s’ogetìstica e sos hobbistas de Associazione creativi del Nuorese; sos artesanos de Ceramiche Deiana; sas corbuleddas de Luca Funedda; sos granos antigos de I Grani di Atlantide; s’artesanadu e sos gurteddos de Sergio Corrias.
Intre sos puntos de interessu finamentas sos stand de Cosmo, partner mannu de s’eventu cun unu servìtziu de nolègiu cun tzaferru ativu a die intrea, e de sa Rete d’impresa La Caletta, cun informos e merchandising. Totu est coordinadu dae sos organizadores de sa manifestatzione chi ant a àere s’info point issoro frunende assistèntzia, ghia e promotzione de su territòriu.
Prenu fintzas su programma de s’intratenimentu musicale cun duos Dj set (Ozzy e Giove), bator esibitziones live (Made in Japan, Dirty Chease, Mnemonia e Prisma) e una ràdiu web cun trasmissiones in direta, intervistas e mùsica de sos Dj.
E àteru b’at, ca in su CalaBeer costumant a donare momentos de allega e de meledu in contu de fainas in su e pro su territòriù. «Che a onni annu – annanghent dae Kawham –, cun s’agiudu de sas impresas locales e de su Comune de Thiniscole, punnamus a promòvere unu modellu de isvilupu sustenìbile a livellu econòmicu, ambientale, e sotziale».
De custa manera, a pustis de sos addòbios de sas editziones coladas in contu de ambiente e de territòriu, ocannu su tema isseberadu at a èssere su de su traballu. S’argumentu, chi cumbinat dèghidu cun sa data de su primu de maju, l’ant a pigare a mangianu a tardu in pratza de su Portu, cun interventos e reladores chi s’ant a connòschere sas dies imbenientes.
«Su Calabeer – nos contant sos organizadores – naschet 7 annos a como gràtzias a sa partetzipatzione de unos cantos intre sos mègius birrifìtzios sardos e gràtzias a sos artesanos lòmpidos dae cada chirru de s’ìsula. Semus a sa de chimbe editziones gràtzias a totu sos chi annu cun annu b’ant fatu unu brincu. Pro unos cantos esposidores sa data de su primu de maju est oramai un’apuntamentu fissu acumpangende·nos dae sa prima bia; àteros, imbetzes, nos ant connotu visitende·nos e torrende·bi a pustis comente protagonistas, cada unu cun sas fainas suas»
Unu disìgiu? «Diamus chèrrere chi, a concruos de die, cada visitadore si nche potzat giùghere in fatu agigu de tastos e de nuscos chi custa terra lis dat, ischende chi custu logu est biu die cun die s’annu intreu e no in s’istiu ebbia».


Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018

De lèghere

Atualidade

«Emergèntzias e oportunidades» in sa mirada sua. Ma sos amministradores unidos sufrint sos sèberos de Casteddu e de Roma, in ue sunt partzidos

Isport

Ruju-biaitos in foras de sos play off

Isport

Su campione de s’ìpica sarda e italiana teniat 64 annos Su fantinu de Lanusè, classe 1960, si nch’est mortu giòbia su 23 de maju, pro...

Atualidade

Istrumada atzessìbile e segura comente diritu umanu fundamentale. Initziativa de sos tzitadinos europeos. Sa campagna “My Voice, My Choice” dat a is tzitadinos europeos...