Comente podet istare una persone chi at coladu annos meda de sa vida sua in presone e chi petzi in finitias resurtat innotzente e assoltu? S’istòria de Beniamino Zuncheddu la connoschimus totu cantos. E totu cantos amus àpidu motivu de formulare una dimanda prus chi non fàtzile: «Chie bi lu torrat su chi nde l’ant bogadu?».
Como, fintzas movende dae cussa acontèssida trista, b’at una proposta de lege, promòvida dae su Partidu radicale, chi punnat a garantire un’assegnu a chie, finidu su protzessu, non resurtat prus colpèvole.
«B’at persones – leghimus in su situ de su partidu – chi lis ant destruidu s’esistèntzia. Sa proposta previdet s’assegnu dae su momentu de s’assolutzione finas a sa sentèntzia de rifata de su dannu. Ca est pròpiu in cussu tempus, chi podet durare ses, sete, oto, deghe annos, chi is persones no ischint ite fàghere: unos cantos andant a sa Caritas, àteros sunt custrintos a furare e àteros, in mancàntzia de sa famìlia, diant pòdere pensare de dormire in suta de unu ponte».
Su cuesitu est presente in su situ de su ministeru de sa Giustìtzia. E custas sunt sas paràulas de Augusta Zuncheddu, sa sorre de Beniamino, publicadas in su Sole 24 Ore: «Che a frade meu Beniamino b’at mìgias de tzitadinos chi, a pustis de los àere liberados dae galera e de àere pèrdidu totu, s’agatant abbandonados dae s’Istadu. No est giustu. No est umanu. Bi cheret una lege de tziviltade».
Non b’est nemmancu su tantu de nàrrere chi cun custas refatas s’Istadu bi perdet. Ca bi perdet de prus lassende gente innotzente in intro cun gastos mannos a beru. Sunt belle milli onni annu sas detentziones ingiustas. In su momentu de istèrrida de custu artìculu sas firmas regortas sunt petzi 1.860 de 50.000 chi bi nde cherent. Cheret chi sa chistione intret in s’agenda de chie detzidet pro prenare unu bòidu chi est una birgòngia.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
