No est dae meda chi est finidu su Ramadan. Su de noe meses de su calèndàriu lunare musulmanu, in ue si cummèmorat sa prima rivelatzione de su Coranu a Maometu, ocannu est duradu dae su 28 de freàrgiu a su 29 de martzu. E nemmancu in intro de custu tempus de geunu pro is islàmicos amus bidu sos concruos de su massacru conduidu dae s’istadu israelianu in Palestina.
E nemmancu como chi semus in tempus de Pasca ebràica connoschimus àteru iscenàriu. Sas bombas sionistas in sos ospidales nos nd’ant dadu cunfirma. Custa Pasca, Pesah, la sunt afestende dae s’interinada de sa de 14 dies de su mese de Nisan, est a nàrrere, ocannu, dae su 12 de abrile ammentende sa liberatzione de su pòpulu ebràicu dae s’Egitu e s’èsodu suo conca a sa terra promissa.
B’at meda de ite nàrrere in contu de liberatzione e de terras, medas de custas pigadas a is chi lis narant “àrabos”. Custa Pasca, is ebreos, finint de l’afestare su 20 de abrile.
Pròpiu sa matessi die chi is catòlicos festant sa resurretzione de Cristos (est dae su Cuntzìliu de Nitzea de su 325 chi ruet sa domìniga a pustis de su primu prenilùniu beranile). Ma su 20 est fintzas Pasca pro is cristianos ortodossos, a dae chi ocannu sas datas cumbinant. Duncas est festa finamentas in Ucraina e in Rùssia.
Custa cumbinatzione pro cristianos (de Roma, de Kiev e de Mosca) e ebreos, a pagu tempus dae su mese islàmicu, diat dèvere pònnere is òmines a meledare. E mescamente is guvernantes e is cabos de istadu chi faghent a lestru a nàrrere chi “Deus est cun nois”, fintzas cuntzedende una trègua de pagas dies.
Ocannu custas festas sunt che a sos alliniamentos de sos pranetas chi cada tantu pintant continuidades in sas àeras noturnas. In ue est su disìgiu de sa paghe, de sa fraternidade e de sa solidariedade intre sos pòpulos? Forsis pròpiu in sos pòpulos, in sa parte prus suferente de custos pòpulos. A cando sa Pasca issoro?
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
