Ùndighi sunt sas listas chi amus a agatare in s’ischeda chi ant aprontadu pro sa tzircuscritzione nostra, sa de sas ìsulas Sardigna e Sitzìlia.
Sa prima lista chi agatamus est sa de s’alleàntzia Birdes e Manca (Alleanza Verdi Sinistra) rapresentada in Itàlia dae sos ecologistas de Bonelli e dae sos de Frantoianni (Sinistra italiana). In casu de cunsensos bastantes, sos eletos nch’ant a lòmpere chie a su grupu de sos birdes/alleàntzia lìbera europea, chie a su Gue/Ngl (manca unitària europea, manca birde nòrdica).
Fat-fatu b’amus su M5S, chi però non at galu disinnadu a cale grupu at a aderire, a su chi narat Conte, su matessi Conte chi acusat a sos segretàrios de partidu chi sunt candidados ma chi non b’ant a andare a Bruxelles.
Sa de tres listas est sa de Fratelli d’Italia, cun Meloni chi punnat a èssere su puntu de riferimentu continentale de sa dereta e de su grupu ossimòricu Cunservadores e riformistas. Grupu chi est prontu a retzire s’adesione de Orban.
Su Pd est a pustis. Sena su nùmene de Elly Schlein in sa lista ma cun sa segretària candidada. Sos eletos ant a èssere parte de su grupu de sos Sotzialistas e de sos democràticos, ragrupamentu nàschidu pròpiu cun sa formatzione de su Pd (ex Ds e populares).
Sa segunda colunna de s’ischeda comintzat cun sa Lega de Salvini, partidu in birbìllios pro more de sa presèntzia de unu generale chi punnat a pigare tantos votos cantos libros at bèndidu. Su “carroccio” faghet parte de su grupu Identidade e democratzia, unione de sovranistas comente Le Pen e sos tedescos de AfD, in cumpetitzione cun sa dereta de Meloni e Orban.
Stati uniti d’Europa ghetat a pare renzianos, sotzialistas de su Psi, radicales, sos de Bonino e àteras formatziones. Puntu de aprodu su grupu de Renew Europe. Su Psi, però, faghet parte de su Partidu de su sotzialismu europeu.
In Renew Europe fintzas s’ex de Renzi, Calenda, cun una lista chi acasàgiat republicanos e àteras listas.
Serrat sa segunda colunna su misciamureddu nord-sud de Libertà cun unu sìmbulu chi parte un’isportellu de frigorìferu prenu de calamidas tantos sunt sos simbuleddos in intro.
Ùrtima colunna pro sa lista de Santoro, Pace terra dignità chi però issu etotu narat chi no est de manca ebbia. Su partitu organizadu prus mannu chi b’est in intro est Rifondazione, fundadore de su Gue e de su partidu de sa Manca europea.
A concruos duas listas aderentes a su partidu populare europeu: Forza Italia (cun in intro Noi Moderati e fintzas sos Riformadores sardos) e Alternativa popolare de su sìndigu de Terni Bandecchi.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
