Est in unda su documentàriu de sa televiosne tedesca ARTE TV giradu in Ogiastra e dedicadu a s’imbetzamentu e a sa longevidade. Su giornalista Markus Tobias Henssler e s’iscuadra sua, pro belle duas chidas, in abrile, ant intervistadu e filmadu is betzos e is betzas de Àrthana, Biddamanna Strisàili e Foghesu, pro cumprèndere is “segretos” de sa longevidade de sos sèneghes chi bivent in cussas partes de su mundu in ue s’isperu de vida est meda prus artu de sa mèdia mundiale.
Su documentàriu de 30 minutos cumentzat cun Antonangelo Murinu de 90 annos, berbegàrgiu de Biddanoa Strisàili chi sighit a pàschere is berbeghes, a ddas mùrghere e a fàghere su casu. Sighet posca cun s’intevista a su tzentenàriu de Àrthana Attilio Stochino e a su dutore de sos tzentenàrios, Dot. Raffaele Sestu de Àrthana, mèigu de famìlia pro 35 annos chi at assìstidu prus de 20 betzos che nche ant giumpadu is chent’annos, sena contare is de prus de norant’annos.
In su vìdeu ddoe est peri s’istudiosos, su professore biòlogu Edoardo Fiorillo de su laboratòriu CNR de sa Progenia de Lanusè, chi ispiegat sa punna de is chircas chi s’istitutu est faghende dae su 2001 gràtzias a su traballu de incumentzadu dae su genetista Giuseppe Pilia, bonànima, chi tenet comente ogetu de istùdiu sa populatzione de s’Ogiastra, mescamente de is biddas de Lanusè, Àrthana, Elini e Irbono.
In su curtzumetràgiu meravigiosu, in ue si bident finas is paesàgios ispantosos de s’Ogiastra, is betzos, sotados dae su giornalista tedescu, chircant issos etotu de ispiegare su segretu chi ddos at fatos lòmpere a s’edade issoro.
Is ripresas sunt istrada fatas gràtzias a s’agiudu de is Prolocos de Àrthana, Biddamanna e Foghesu, e cun su sustennu logìsticu de sa sotziedade Suìa.
Inoghe a suta podides bìdere su documentàriu, chi pro s’ora est in limba tedesca ebbia. Sa versione in italianu at a essire in mese de argiolas.
https://www.arte.tv/de/videos/115490-008-A/re-die-geheimnisse-der-hundertjaehrigen-sarden
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
