Unu fogu nou de sonus intre de lìngua, identidadi e mundu de oi. Su discu nou de Su Dotori si tzerriat “Fogu”.
“Est unu traballu chi brùxiat a bellu a bellu e lassat is sinnus suus” fant sciri in sa presentatzioni. Est unu camminu in sa mùsica chi ponit in paris sa scritura, sa lìngua sarda, is arrexonus a pitzus de is chistionis de sa genti e sa chirca de sonus nous. “Totu custu ddu fait tenendi bia sa manera lìbera de s’artista de fai mùsica e de si presentai in pùblicu”.
Su discu est bessiu oi in totu is piataformas digitalis. A pustis ant a fai fintzas su cd po ddu bendi, cun milli copias in totu. Custu progetu ddu ant fatu cun s’agiudu de su NuovoImaie.
Sa presentatzioni de su discu at a essi cenàbura 26 de làmpadas in su Corto Maltese, in Casteddu. “At a essi una merì de mùsica biva pensada pròpiu po atobiai sa genti e abarrai in mesu a su pùblicu, presentendi in su palcu custu traballu nou. In cussa pròpiu merì ant a fai puru su vìdeu de sa cantzoni chi si tzerriat “Anticolonialista”.
