Cando faeddamus de Marte deretu pensamus a Elon Musk o a s’epopea de Gaetano Maria Barbagli (interpretadu dae Corrado Guzzanti 20 annos a como) e cameratas. Como, però, tocat a contare un’àtera istòria chi, in contu de bisos matzianos, movet dae custa terra. Est un’istòria de cooperatzione chi est nàschida in tempos de Covid e chi oe est devènnida unu brevetu internatzionale giai cuntzessu in Giapone e Rùssia.
Protagonistas de custa aventura iscientìfica sunt sas Universidades de Casteddu e de Tàtari, su tzentru de chirca, isvilupu e istùdios superiores Crs4, su Distretu àero-ispatziale de sa Sardigna Dass e s’azienda Tolo Green. Traballende paris, iscientziados e dotorandos ant progetadu unu machinàriu innovativu, unu clinostatu ispetziale capatze di trampare sa fìsica terrestre pro reproduire sa gravidade reduida e s’atmosfera martziana. In custu habitat artifitziale ant fatu unu miràculu: sa microalga ispirulina, coltivada in s’aristanesu, at mustradu sas capatzidade suas de pòdere crèschere e bundare in cunditziones extraterrestres.
Custu microrganismu pretziosu, duncas, si càndidat gasi a èssere un’elementu tzentrale pro sas atividades umanas de unu cras in su praneta ruju. In s’ispàtziu, s’ispirulina at a pòdere nudrire sos astronàutas e generare ossìgenu vitale pro mèdiu de sa cunversione de s’anidride carbonica martziana. Unu protzessu chi at a permìtere de biagiare lèbios, isfrutende sas risursas locales e sos refudos metabòlicos de s’echipàgiu.
«Sa cuntzessione de su brevetu in Giapone e Rùssia – narat Giacomo Cao, presidente de su DASS – est motivu de cuntentesa manna ca mustrat sa bonidade de sas atividade iscientìficas e tecnològicas fatas in terra sarda in su setore àero-ispatziale. Totu custu pro mèdiu de unu giogu de iscuadra àbile e profetosu chi, nos l’auguramus, potzat atràere investimentos importantes de caràtere pùblicu e privadu pro su programma Small mission to Mars. In relatzione a custu semus produende s’isfortzu màssimu cun s’ispera de lòmpere a su praneta ruju in su 2035».
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
