In su fùbbalu comente in su diritu b’at una làcana chi non si podet bìdere ma chi non si podet nemmancu brincare. Est sa làcana chi partzit sa giustìtzia dae su caos. E cussa làcana est su regulamentu. «Forse non sarà una canzone, a cambiar le regole del gioco», cantaiant Bennato e Nannini pro su mondiale de 36 annos a como. Ma como, como chi s’Itàlia a su mundiale de ocannu non b’at postu pee, su tormentone est un’àteru cun sa pretesa de las mudare, in peus, sas règulas.
Sas crònacas giuditziàrias cun protagonista su butegheri de prendas Mario Roggero in contu de difesa legìtima nos intregant una tifoseria chi pretendet de abolire sa targhita ruja cun decretu. Cando cumbenit, naturale: sas tifoserias giai nde diant chèrrere de targhitas grogas e rujas pro sos giogadores aversàrios (dae sos ladros de puddas a chie faghet cunflitu sotziale).
Bene: su de sustènnere chi a currizare in foras de domo e a isparare a àtere a cosas fatas sunt casos in ogetu chi non meressent punitzione, est comente a chèrrere isdoganare su fallu de reatzione. S’àrbitru, a bisu de sa tifoseria Roggero, non diat dèvere fruschiare, autorizende a su giogadore a si vengare pagas iscutas a pustis cun unu fallu suo. Sos padros birdes de giogu si diant mudare deretu in unu Far West.
E comente in totu sas tifoserias b’at chie la narat prus manna, invochende sa difesa prefentiva galu in antis chi su malintragnadu bàrighet s’intrada de domo. Est su bisu proibidu de eliminare da norma Dogso (Denying an obvious goal-scoring opportunity), sa punitzione pro chie impedit, cun fallu, un’ocasione crara de gol aversàriu. Chie cheret isparare in antis de s’ora (cunvintu chi chie intrat chèrgiat isparare fintzas issu e non furare ebbia) arresonat che a su difensore chi non resesset a furare sa botza a s’aversàriu ma l’iscudet a terra pretendende chi s’àrbitru li fatzat sos cumplimentos.
Ma su fùbbalu e su còdighe penale nos ammentant chi su tempismu e sa proportzione non sunt un’optional: si neutralizas una minetza violende sas règulas o sa lege, b’at un’àrbitru e b’at unu giùighe chi las devent aplicare. E petzi a sas règulas e a sas leges sunt sugetos. No a sa polìtica chi pedit sa gràtzia. Custu est s’ùrtimu tilt. Inoghe parlamentares e opinionistas ant tentadu s’invasione de campu inghiriende sos tres grados de giudìtziu che a cussos chi intervenent in sa giurisditzione isportiva pro nde bogare un’iscualìfica.
Esemplare s’intrada a anca tètera de Donald Trump pedende a Gianni Infantino de gratziare a su giogadore americanu Foralin Balogun, giagaradu dae campu pro unu fallu in su disafiu contra a sa Bosnia su 2 de trìulas coladu. Ma si sa Fifa at pinnigadu sas règulas suas inghenugrende·si a sa polìtica, calicunu at ammentadu a sas tifoserias de sos palatzos de Chigi, de Madama e de Montetzitòriu chi s’offside istitutzionale galu b’est.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
