Sa de dexi editzioni de Seuinmusica. De su 24 a su 26 de trìulas tres diis de mùsica, spetàculus e eventus in Seui.
Nàsciu in su 2012 e organizau de s’assòtziu Kromatica, su festival at bòfiu fraigai in is annus un’identidadi pretzisa, portendi in su coru de su centru stòricu de Seui artistas cun limbàgius e gèneris diferentis, de su jazz a s’elettrònica, de su blues a su rap, de su teatru musicali a sa cantzoni d’autori. Po festai custu traguardu, su cartelloni proponit intre is nòminis prus de importu de sa scena natzionali e de s’ìsula, comente su chitarrista e cumpositore Paolo Angeli.
Comenti bòlit sa traditzioni, at a èssiri sa SeuinStreetBand a aberri su festival su merì de cenàbara 24 de trìulas, portendi mùsica e allirghia intre de is bias de sa bidda prima chi su pùblicu movat a sa pratza de Santu Juanni. A pustis ddoe at èssiri Brulla, un’ispetàculu de Francesco Giomi e Michela Atzeni, prima de lassai su tretu a su cuncertu de Paolo Angeli, chi at a presentai Lema, su traballu discogràficu ùrtimu suo. A serrai sa prima dii ant a èssiri is sperimentatzionis de TUN – Torino Unlimited Noise, su trio fatu de Gianni Denitto, Fabio Giachino e Mattia Barbieri, chi acapiant jazz, improvvisatzioni e elettrònica.
Sàbadu 25 su festival s’at a aberriri cun sa presentada de s’Annuàriu 2025 de Sa Scena, sa rivista chi de otu annus contat sa mùsica fata in Sardigna, ghiada de Simone La Croce e Claudio Loi. A sighiri, s’aperitivu musicali at a cumpangiai su pùblicu cun is Space Roosters, progetu de su duo Massidda-Meledina, mentris su sero at a sighiri cun su cuncertu de is Feruja, grupu de su Sulcis chi acapiat blues, elettrònica, ritmus mediterràneus e de s’Àfrica otzidentali. Sa circa vocal-loop at a èssiri invecis protagonista cun Mumucs, su progetu personali de Marta Loddo, prima de lassai su palcu a su sassofonista Marco Scipione, musicista chi at fraigau un’itineràriu originali intre de jazz, world music e sperimentatzioni. Su finale at a èssiri afidadu a is casteddajus La Grasa de Pollo.
S’ùrtima dii de su festival s’at a oberri ancora in su sìnnu de sa mùsica cun s’aperitivu firmau Mumucs, innantis de unu de is atòbius prus abetaus de totu sa manifestatzioni. Su sero ddoe at a èssiri Una verissima storia del Jazz pensau de Pier Francesco Loche e Paolo Fresu e produidu de Insulae Lab, chi contat, intre de fueddus e mùsica, su tempus de ispantu de su jazz sardu de is annus Otanta. In su palcu, in paris cun Loche, nci ant a èssiri Gianluca Tozzi e Paolo Assiero Brà. A serrai sa de dexi editzioni de SeuinMusica ant a èssiri Ilaria Porceddu e Emanuele Contis, chi ant a presentai Lumià, unu traballu essiu immoi immoi chi ponit in paris cantzoni de autori, elettrònica e mùsica tzinematogràfica.
In paris cun is cuncertus no ant a mancai is eventus de costau, de sempri parti de sa matessi identidadi de su festival. Po totu su tempus de sa manifestatzioni at a èssiri possìbili a bìsitai sa mustra fotogràfica “Dieci anni di SeuinMusica”. De cenàbara a domìnigu su centru polivalenti “Is Minadoris”, in sa ruga de Torino, at a acolliri puru su stùdiu de tatuàgius Crazy Cat, chi at a agiudai a fai prus manna s’atmosfera de sa manifestatzioni cun unu spàtziu dedicau a s’arti de su tatuàgiu.
Arribau a sa de dexi editzioni sua, SeuinMusica sighit aici a si cunfermai no sceti comenti una rassegna musicali, ma comenti un’atòbiu intra de limbàgius artìsticus, sperimentatzioni e valoritzatzioni de su territòriu, capaci de furriai po tres diis su tzentru stòricu de Seui in d’unu laboratòriu culturali.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
