Lunis su 29 de cabudanni 2025 in Sardigna si votat pro sas eletziones provintziales de segundu livellu pro elègere sos presidentes e sos cussìgios de sas provìntzias de Nùgoro, Aristanis, Gaddura Nord-est, Ogiastra, Sulcis Igresiente e Campidanu de Mesu, in prus de sos cussìgios de sas Tzitades metropolitanas de Casteddu e Tàtari.
Sa data l’at fissada sa presidenta de sa Regione Alessandra Todde, chi at firmadu su decretu de inditzione de sos comìtzios. Nointames s’ispinta de su Cussìgiu regionale pro su votu populare, su Parlamentu no at galu modificadu sa normativa atuale e duncas ant a èssere eletziones de segundu livellu: votant petzi sos sìndigos e sos cussigeris comunales.
Mancant pagu prus de duas chidas a s’iscadèntzia pro sa presentada de sas listas, e su cuadru est galu pagu craru. In custas dies, sos cussìgios comunales e sas seas de sos partidos sunt bòidos, ma seguru sas segreterias sunt traballende a sa cua, e duncas, nde diant pòdere istupare a foras àteras noas a sa torrada dae is bacàntzias. Ma pro como, custa est sa situatzione.
Su territòriu prus aunidu est su de su Sulcis-Iglesiente, ue de 24 sìndigos 19 ant pedidu sa candidadura de su primu tzitadinu de Igrèsias Mauro Usai (Pd). Unu fronte trasversale, chi giumpat sas partziduras polìticas, cun sa punna de afortiare su ruolu de sa Provìntzia comente motore de isvilupu e atratotore de risursas.
In Gaddura sa candidadura forte est sa de Settimo Nizzi, sìndigu de Terranoa e figura istòrica de Forza Italia. Su progetu, cumpartzidu fintzas dae amministradores de su tzentrumanca, punnat a una lista unitària pro garantire rapresentàntzia a totu su territòriu.
Iscenàriu prus partzidu in s’Aristanesu, acanta su tzentrudereta at ufitzializadu sa candidadura de Paolo Pireddu, sìndigu de Biddaubrana. A s’àtera banda, su tzentrumanca est galu a detzìdere: intre sos candidados possìbiles b’est su sìndigu de Crabas Andrea Abis, ma su votu ponderadu paret favorire su tzentrudereta, forte in sos comunos prus populados.
In Provìntzia de Nùgoro, su tzentrumanca càstiat a Giuseppe Ciccolini (Pd, sìndigu de Bitzi), e su tzentrudereta est pompiende a Riccardo Uda (sìndigu de Macumere).
In Ogiastra su nùmene prus seguru de su tzentrudereta est su de Angelo Ivano Stochino (sìndigu de Àrthana), mentras su tzentrumanca est traballende a una possìbile lista unitària.
Situatzione dudosa meda in su Campidanu de Mesu: su sìndigu de Seddori e cussigeri regionale Alberto Urpi est sotende sos amministradores a lassare a un’ala sas partziduras de partidu pro dare fortza a su territòriu.
Su chi nde essit a pìgiu est ca in sas consultatziones provintziales, chi ant a interessare 378 comunos intre provìntzias e tzitades metropolitanas, unu ruolu de importu l’ant a tènnere prus sos echilìbrios locales e sas alleàntzias trasversales chi non sas apartenèntzias de partidu.
Agabbadas sas fèrias istadiales, sas tratativas e sos giogos s’ant a serrare a mala bògia, e s’ant a definire sas candidaduras unitàrias, ca s’iscadèntzia de su 29 cabudanni est apresiende·si.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
