Lìgere in galèra cun babbu: sa Biblioteca Metropolitana arribat in Uda. In s’istrutura penitentziària cumentzat su programma ‘Naschidos pro lìgere’, chi promovet sa letura tra detenudos e fìgios.
Lìgere paris a su pròpiu babbu o a sa pròpia mama, fintzas intro sos muros de sa presoni. Su programma ‘Naschidos pro lìgere’ iscumpassat su lìmite de sa Domo circondariale Ettore Scalas de Uda, cun sa punna de promòvere sa letura comente a momentu de crèschida de su pipiu e de sa relatzione tra genitore e fìgiu, fintzas in situatziones de dificultades.
S’initziativa, promòvida dae su Sistema bibliotecàriu de Monte Claro de sa Tzitade Metropolitana de Casteddu, est istada presentada eris merie in sa biblioteca de s’istitutu penitentziàriu. A s’eventu ant partetzipadu una deghina de detenudos cun sas famìlias issoro, su diretore e sos educadores de su càrtzere, una pediatra e carchi prepostu de sa Biblioteca Metropolitana.
S’atòbiu est cumentzadu cun sa letura de una filastrocca e de un’istòria pro pipios, sighida dae sa presentada de su programma ‘Naschidos pro lèghere’, s’initziativa pedagògica chi de 20 annos promovet sa letura pro sos pipios, in piessignu finas sos 6 annos, comente instrumentu pro instaurare unu raportu emotzionale tra adultu e pipiu. Sa pediatra at posca illustradu sas evidèntzias sientìficas de sos benefìtzios de sa letura in s’isvilupu tzerebrale de sos minores.
No est sa prima borta chi unu programma de letura iscumpassat su lìmite de un’istrutura cartzerària, ma est sa prima bia in cale interessat ultres a su detenudu fintzas su nùcleu familiare suo, in unu clima de armonia.
