Una vida dedicada a s’archeologia, cun s’iscoberta de medas sitos e iscavos pruschetotu in su Sulcis. Eris in Carbònia est istada ammentada sa figura de Vittorio Pispisa gràtzias a sas testimonias de unas cantas tra sas prus autorèvoles figuras de su mundu archeològicu e de museos de sa Sardigna.
S’apuntamentu est istadu organizadu dae s’assòtziu Amici de sa Mina e de su Csc Carbònia de sa Sotziedade Umanitària, cun su patrotzìniu de su Comunu de Carbònia a intro de una rassegna dedicada a s’ammentu de sos pessonàgios chi ant lassadu unu sinnu in sa vida polìtica e culturale de sa tzitade minerària.
Tzitadinu de Carbònia, imprendidore afirmadu e apassionadu de archeologia, a Vittorio Pispisa aiant dadu su tìtulu de ispetore onoràriu pro sa zona de su Sulcis pro contu de sa Soprintendenza a sas Antighidades. De prus, sa passione sua, s’aficu suo e su rigore suo li fiant bàlidos in su 1970 sa Medàllia de su Quirinale a sos benemeritos de s’iscola de sa cultura e de s’arte.
Cunsideradu un’autoridade in su campu de s’archeologia nuràgica, fenìtzia, pùnica e rumana, Pispisa fiat istadu fintzas depositàriu – pro motivos de istùdiu – de un’u’artu nùmeru de repertos, in manera impròpria definida comente ‘colletzione Pispisa’, posca postu in su museu archeològicu de Carbònia.
Medas sunt sas campagnas de chirca e de iscavu a sas cales at garantidu su suportu suo e s’esperièntzia sua. Vittorio Pispisa at operadu in sas provìntzias de Casteddu e Aristanis, e in pessignu in sos sitos de Monte Sirai, Santu Antiogu, Panes Loriga, Bithia, Chia, Teulada.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22
Attività realizzata col contributo della Regione Sardegna – IMPRENTAS 2021-2022. LR 22/2018, art. 22
