Iscadèntzia su 31 de maju. Normas ortogràficas e regulamentu in su situ premiozieri.it
S’assòtziu Premio Ozieri Aps at istèrridu e publicadu su bandu pro sa de 66 editziones de su cuncursu literàriu omònimu riservadu a sas poesias e a sos contos in limba sarda e in sas àteras limbas de Sardigna (gadduresu, turritanu, catalanu de S’Alighera e tabarchinu).
Comente ogni annu, pro pòdere leare parte a sas tres setziones prevìdidas (finas a totu cantas), tocat a imbiare cumponimentos inèditos.
Custas sas tres setziones: Poesia sarda “Antoni Sanna” (non prus de baranta versos rimados o mancu e sena vìnculu de argumentu); Prosa sarda “Tonino Ledda” (contos de màssimu chimbe pàginas word); Tra poesia e càntigu “Antoni Cubeddu” (cun versos iscritos pro èssere cantados sighende sos modellos de su connotu de s’oralidade comente mutos, modas e àteros ischemas).
Sas òperas imbiadas las at a valutare sa Giuria ghiada dae su Prof. Dino Manca de s’Universidade de Tàtari cun s’iscuadra sua: Anna Cristina Serra (vitzepresidente), Cristiano Becciu, Antonio Canalis, Duilio Caocci, Clara Farina, Attilio Mastino, Riccardo Mura, Gianbernardo Piroddi, Simone Pisano, Gabriele Tanda, Salvatore Tola.
Su cussìgiu pro sos autores est su de sighire sas règulas ortogràficas de su prèmiu Otieri chi sunt publicadas in su situ web de s’assòtziu omònimu de promotzione sotziale; pro sas òperas iscritas in sas limbas minoritàrias turritana, gadduresa e tabarchina sunt inditadas sas normas istandard issoro aprovadas dae sa Regione Sardigna; pro s’aligheresu sas normas adotadas dae su Comune.
Custos sos prèmios pro sos binchidores de totus tres sas setziones: assegnu de 500 èuros e medàllia pro sos primos; assegnu de 300 èuros e medàllia pro sos segundos; assegnu de 200 èuros e medàllia pro sos de tres classificados. In previsione fintzas sas mentziones de onore e sos prèmios ispetziales.
S’editzione de s’annu coladu l’ant bìnchida Antonello Isoni cun sa poesia “Tarra di gherra e di branu”, Domenico Battaglia cun su contu “Tra infernu e paradisu” e sa bonànima de Salvatorangelo Murgia cun su ‘bator trobojadu’ suo intituladu “A s’amigu caru Bannantoni Busio”.
Su bandu intreu, cun in intro sas modalidades de imbiu e cun s’inditu de s’iscadèntzia de su 31 de maju pro bi pòdere pigare parte, l’ant publicadu in su situ premiozieri.it.
De prus, s’assòtziu Premio Ozieri Aps est aprontende unu calendàriu prenu de manifestatziones a costàgiu de su cuncursu pro promòvere e ispainare a 360 grados sa cultura e s’arte de sa Sardigna.
Prèmiu Otieri de Literadura Sarda APS
Carrera de Ugo La Malfa, 28 – 07014 Otieri (SS)
web: premiozieri.it
email: info@premiozieri.it
PEC: pec@pec.premiozieri.it
