Dae unas cantas chidas s’allegat meda de su progetu turìsticu de Cala Finanza, a binti chilòmetros dae Terranoa, una vitzenda chi pro medas rapresentat unu pretzedente chi at a pòdere cunditzionare su benidore de is costas sardas. Semus alleghende de unu de is logos prus ispantosos de su Mediterràneu: sa costa de Lòiri–Portu Santu Paulu, craru a s’ìsula de Tavolara e a pagos passos de s’Àrea Marina Protèghida de Tavola-Punta Coda Cavallo
In custu logu una sotziedade privada, sa Tavolara Bay Srl, controllada dae su grupu brasilianu JHSF, bolet realizare unu cumplessu turìsticu de lussu mannu. Su progetu cumplessivu previdet hotel a chimbe isteddos, villas esclusivas, istruturas e servìtzios riservados una clientela internatzionale de fàscia arta.
A fàghere discutire no est petzi sa mannària de s’investimentu, ma ca su progetu apat otentu is autorizatziones mancari is parres contràrios de is entes de tutela su territòriu. Regione Sardigna, ufìtzios tècnicos regionales, amministratziones locales, Subrintendèntzia, Corpus Forestale e medas assòtzios ambientalistas ant evidentziadu crititzidades acapiadas a s’impatu ambientale e a sa cumpatibilidade urbanìstica de s’interventu.
Segundu su WWF Itàlia, si tratat de un’operatzione chi arriscat de cumpromìtere in modu irreversìbile unu de is ùrtimos tretos de costa galu annido de sa Gaddura. S’assòtziu denùntziat s’arriscu chi un’àrea classificada comente a zona de amparu ambientale si furrit a bellu a bellu in unu produtu immobiliare destinadu a pagos, alterende un’ecosistema de istraordinàriu valore naturalìsticu.
De sa matessi idea sunt fintzas àteras organizatziones comente Legambiente, Italia Nostra e Gruppo di Intervento Giuridico, chi cuntestant su recursu a is protzeduras ispetziales de sa ZES Ùnica pro su Mesudie. Pro mèdiu de custu trastu su progetu est arribbadu finas a su Cunsìgiu de is ministros, chi su 4 de làmpadas coladu at denegadu s’opositzione presentada dae sa Regione Sardigna.
Pro sa presidentas de sa Regione, Alessandra Todde, sa detzisione non benit rispetadas is cumpetèntzias regionales in matèria urbanìstica e paisagìstica. «Is leges de sa Sardigna non faghent a ddas inghiriare», at decraradu, annuntziende su ricursu a su Tar.
Sa chistione est custa: si un’àrea cunsiderada de grandu valore ambientale podet èssere trasformada nointames is pàrreres negativos de is entes territoriales e de is organismos de amparu, cale garantzia abarrat pro is àteros tretos de costa isulana?
Pro is ambientalistas su casu de Cala Finanza andat prus addae de su sìngulu progetu. Est su sìmbulu de unu sèberu intre duos modellos de isvilupu: a una banda sa valorizatzione sustenìbile de su paisàgiu, a s’àtera sa pressione edificatoria contina in is costas prus pregiadas. Unu disafiu chi no interessat sa Gaddura ebbia, ma sa Sardigna intrea.
