Sa noa lompet dae is ufìtzios de s’Assessoradu regionale de su Traballu de Casteddu, acanta Aspal e Cumandu Militare Esèrtzitu de sa Sardigna ant firmadu un’acòrdiu in intro su progetu “Azioni e percorsi per l’orientamento al lavoro nell’Esercito Italiano“. Sa collaboratzione, sutascrita dae su diretore generale de s’ASPAL Luca Mereu e dae su cumandante de su CME Sardegna, su generale de brigada Stefano Scanu, at a abarrare in vigèntzia finas a su 31 de nadale 2027 e punnat a isvilupare fainas de orientamentu e informatzione in contu de is oportunidades professionales ofertas dae s’Esèrtzitu.
S’acòrdiu previdet chi is Tzentros pro s’Impreu de Casteddu, Tàtari, Nùgoro e Aristanis devèngiant puntos de riferimentu pro informare giòvanos, disocupados e persones in chirca de ocupatzione subra is percursos professionales militares. Sunt prevìdidas dies de orientamentu, atividades de animatzione territoriale, sustennu in sa partetzipatzione a is cuncursos de s’Esèrtzitu e acumpagnamentu a su reinserimentu professionale de is voluntàrios cungedados.
Segundu s’assessora regionale de su Traballu, Desirè Manca, si tratat de unu trastu ùtile pro garantire a is giòvanos informatziones craras e atzessìbiles pro unu sèberu professionale chi medas cunsìderant un’oportunidade. S’obietivu declaradu est de creare ocasiones ocupatzionales noas e afortiare sa collaboratzione intre istitutziones.
Pro medas, però, custu acordu non rapresentat in manera simpre un’acòrdiu tècnicu intre entes pùblicos, ma un’àteru passu conca a unu protzessu prus ampru de normalizatzione de sa presèntzia militare in s’ìsula. Una Sardigna chi giai acasàgiat sa cuntzentratzione prus arta de tzerachias militares de Itàlia, polìgonos, àreas de addestramentu e indùstrias bèllicas, bidet como su mundu militare intrare fintzas in is percursos pùblicos de orientamentu a su traballu.
Dae annos s’allegat de sa cumpatibilidade intre isvilupu econòmicu e presèntzia militare. Is bases sunt presentadas a s’ispissu comente oportunidades econòmicas, is tzerachias comente unu sacrifìtziu chi nos tocat a bajulare a mala bògia, s’indùstria de is armamentos comente una risursa ocupatzionale. Cun s’acòrdiu intre ASPAL e Esèrtzitu, sa carriera militare intrat in manera ufitziale a is percursos de orientamentu promòvidos dae s’agèntzia regionale chi s’òcupat de is polìticas ativas de su traballu.
Sa chistione, duncas, non pertocat su deretu personale de seberare sa professione militare, prusaprestu su modellu de isvilupu chi is istitutziones detzident de promòvere. In una regione chi sighit a fàghere is contos cun sa disocupatzione de is giòvanos, ispopulamentu e mancàntzia de oportunidade in is setores innovativos, faghet a si dimandare si sa prioridade depat èssere sa de afortiare is collaboratziones cun su sistema militare opuru investire de prus in chirca, tecnologias noas, cultura, turismu sustenìbile, massaria e impresas locales.
Una pregonta chi non pertocat sa chistione de su traballu ebbia, ma s’idea etotu de Sardigna chi bolimus fraigare pro is levas noas.
