«Isfogende cada pàgina, su letore est invitadu a nch’intrare a unu mundu de colores inchesos, de tessutos pregiados e de indoros rafinados chi, a cuncordu, cumponent su mosàicu prus chi non ricu de sa bestimenta traditzionale sarda. Sas descritziones fundudas, chi acumpàngiant sas fotografias tiradas a minudu, no esplorant sas robas e sos traballos de sa fòrfighe e de sas manos decoradoras ebbia, ma finas su significadu su prus arraighinadu chi custos elementos ant rapresentadu e chi, in parte, galu oe rapresentant. Non bi mancant sos ligàmenes e sos riferimentos a sa limba sarda, caminu maistru e pretziadu dae ue pigare notziones, informatziones e curiosidades etimològicas».
Est gasi chi si presentat “Costùmenes”, unu libru chi brotat dae sas ganas chircadoras presentes in intro de s’Unione de sos Comunes de su Monte Arvu, chi est patrotzinadu dae sa Fondazione di Sardegna e chi l’at gestidu sa sotziedade Suia. E chi chenàbura su 25 lu presentant in Thiniscole, in sa sala consiliare de s’Unione de carrera de Isalle, a sas 5 de merie. A su presidente Salvatore Ruiu (sìndigu de Pasada) tocat a istèrrere su tema chi, fatu fatu, l’at a pigare in manos s’antropòloga Giuliana Pittalis in intro de un’allega moderada dae Angelo Canu e dae Gianfanco Migliorisi, dipendentes de s’àrea amministrativa de s’Unione.
«Sos bestires esaminados – narat Ruiu – non sunt pìngios ebbia ma sìmbulos viventes, tramas de istòrias e de vidas chi contant unu patrimòniu ricu e pintirinadu. Su traballu a minudu de sos ufìtzios, de sos espertos e de sos apassionados de sos noe Comunes de s’Unione, at permìtidu unu tessìngiu comune de custu patrimòniu dende vida a un’òpera chi, mancari no in forma cumpleta, si presentat comente puntu de mòvida pro sas generatziones imbenientes de chircadores e de amantiosos de sa cultura».
In sas pàginas, bestidas in forma gràfica dae sas manos sàbias de Intu Agency, b’agatamus duncas sos colores e sas tramas de sas comunidades de Bitzi, Lodè, Lùvula, Onanie, Osidde, Orune, Pasada, Thiniscole e Torpè. Apuntamentu a chenàbura.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
