Su Guvernu at impugnadu sa riforma sanitària chi in s’Ìsula boliat ripristinare is oto Asl betzas. Sunt tres sos artìculos chi ant fatu “iscurcurigare” sa lege: s’11, su 13 e su 47, chi pertocant sa nòmina de sos diretores generales in sas aziendas sanitàrias, sos elencos regionales de sos idòneos a sas càrrigas e sa nòmina de sos cummissàrios istraordinàrios.
Segundu su Consìgiu de sos ministros, custos artìculos “ferrent sa cumpetèntzia cuncurrente istatale”. S’arriscu de ricursu fiat istadu prevìdidu giai dae su consigieri de su Pd Gianfranco Ganau, chi aiat definidu “improbàbile” sa possibilidade de pònnere un’elencu regionale de sos idòneos pro su cunferimentu de sos incàrrigos.
In su mentres, comente sa noa est essida in is giornales, sunt arribbant sas primas reatziones de s’opositzione. “Fiat iscontadu” segundu su capugrupu de sos Progressistas Francesco Agus. “L’aìamus naradu in ogna manera in Àula, ma non semus istados iscurtados. Tantis, ite diat àere pòdidu rispòndere sa Giunta de s’ùnica Regione de su mundu chi faghet una reforma sanitària durante una pandemia?”.
Fintzas sa deputada de su M5s Mara Lapia at cummentadu. “Solinas rèvochet in deretura sas nòminas”, at naradu, afirmende chi est “illegìtima sa delìbera de Giunta chi at nominadu su dotore Massimo Temussi, cummissàriu istraordinàriu de Ares e Ats. S’arriscu — segundu Lapia – est chi totus sos atos emanados dae su cummissàriu nou siant illegìtimos, comente sa nòmina sua, e privos de efetos giurìdicos”.
