Est comintzadu dae pagu su girone nou de su campionadu de sèrie C in ue b’at duas iscuadras sardas gioghende·si·lu chie cun una punna chie cun ateruna. E custas duas oe s’ant a disafiare in un’istàdiu sena logos bòidos e in direta tv in su segundu canale de sa Rai. Oe, a sas bator de merie in su Vanni Sanna de Tàtari, ant a giogare turritanos e gadduresos, Torres e Olbia.
Sa gara de andada, giogada in su Nespoli de Terranoa, fineit cun sa vitòria (0-3) de sos pitzocos de Greco. Oe si torrant a bìdere cun una classìfica chi nche ponet ambas duas sas iscuadras belle a s’estremidade, dae unu chirru e dae s’àteru. Sos tataresos sunt in segunda positzione in fatu a su Cesena; sos de s’Olbia in segunda ma dae s’ùrtima, in antis a sa Fermana ebbia. Duncas b’at chie est gioghende pro nch’artziare a sèrie B (sa Torres non b’est resèssida mai) e b’at chie est gioghende pro non nche falare a sa D.
Sa Torres tenet 47 puntos e una gara in mancu de sa cabulista chi at bìnchidu eris 4-0 contra a su Pontedera annanghende àteros tres puntos a sos 50 chi giai teniat. Est pretzisu a bìnchere, duncas, pro chi non crescat galu de prus sa fua de sos romagnolos e pro chi su Perugia (oe cun sa Spal) non si nch’acurtziet a bellu a bellu minetzende sa segunda positzione.
Sa Torres, chi non podet èssere ogetu de paragone cun su Cesena in contu de rosa e de còmporas, est una bella rivelatzione de su campionadu cun 14 vitòrias (duas in mancu de sos rivales), 5 parègios (che pare a sos romagnolos) e 2 partidas pèrdidas ebbia (petzi una in prus de sos primos in classìfica). Sa diferèntzia prus manna intre sas primas duas (mancari siant sos puntos a determinare sas positziones) est in su cunfrontu de sas retes fatas e de sas retzidas cun saldu positivu de 36 pro su Cesena (su mègius atacu cun 49 e sa mègius difesa cun 13) e de 15 pro sos nostros (33-18).
Tocat a si dare cuidadu. O, cumenti dìzini li sassarési, a giuggassi la barretta. E a nois a los sustènnere!
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
