Sa luadura de s’àera at aumentadu sos casos de coronavirus in su nord de Itàlia?  Podet èssere, narant, ma s’àera lìmpia non firmat su virus chi a s’imbesse caminat in pees nostros

Foto de Anna Shvets dae Pexels

Segundu un’istùdiu de su Sima (Sotziedade italiana de meighina ambientale) b’at una relata tra sa calidade de s’àera e sa difusione de su Covid-19. Nch’est sa possibilidade chi sa presèntzia arta de Pm10 in sa pianura padana siat sa càusa de sa pertzentuale arta de mortos de coronavirus in su nord de Itàlia. A lu nàrrere est un’istudiu conduidu dae su prof. Alessandro Miani, presidente de sa Sima  chi at postu a cunfrontu sos datos de s’Arpa cun sos casos de Covid-19.

In sa pianura padana sos livellos artos de particuladu atmosfèricu (Pm10 e Pm2,5) podent èssere a sa base de su nùmeru artu de sos casos de infetzione. S’istùdiu, conduidu paris cun àteros chircadores de sas universidades de Bologna, Bari, Milanu e Trieste, at postu in evidèntzia comente sas cuntzentratziones de particuladu in s’atmosfera potzat funtzionare comente mèdiu de trasportu de medas cumponentes chìmicos e bilògicos, e duncas peri de su coronavirus. Sos virus si pìtzigant a su pruireddu de Pm10 e Pm2,5 abbarrende in s’atmosfera pro meda tempus e ispainende•si in totue.
Segundu sos chircadores, tra su 10 e su 29 de freàrgiu in sa pianura padana, in base a sos datos frunidos dae sas agentzia regionales pro s’ambiente, sa cuntzentratzione de prùeres fines nche at isciaddidu de meda sos lìmites de lege, donende duncas a su virus s’ampramanu de s’ispainare. Est pro custa resone, narant, chi in su Nord b’at prus positivos a su virus e prus mortos chi non in totu Europa.

Milanu. Foto de Andrea Piacquadio dae Pexels

Giovanni Schiesaro, Gianluca Masella e Riccardo Spano de su movimentu “Biologi per la Scienza” ant ismintzidu s’istùdiu, sustenende chi sa chirca de su Sima est unu “Position paper” ebbia, est a nàrrere un’ipòtesi chi non tenet su suportu de sa comunidade iscientìfica e chi duncas no est istadu nimancu pubblicadu in nisciuna rivista iscientìfica.
S’Òrdine de sos Biòlogos, dirìghidu dae su presidente Vincenzo D’Anna s’est dissotziadu dae su movimentu “Biologi per la Scienza”, acusende•los de èssere petzi tres istudiantes deretos de si laureare in chirca de pubblitzidade chi non si podent permìtere de pònnere in duda sas positziones de sas sotziedades iscientìficas e de sas universidades de Bologna, Bari, Milanu e Trieste chi ant redatadu su documentu. Segundu D’Anna sos datos Istat iscòviant chi in Lombardia si registrant medas casos de prumonita e est dàbile chi s’incuinamentu potzat favorire s’ispàinu de custa patologia, e duncas peri de su coronavirus.

Fintzas s’epidemiòlogu Pierluigi Lopalco, motivadu dae sos giornalistas, at espressadu s’opinione sua sustenende chi est a beru chi sa cundidura apat agatadu in sa luadura de s’àera sas cunditziones favorèvoles pro s’ispainare, ma seguramente s’àera lìmpia non firmat sa maladia, chi a s’imbesse caminat in pees nostros, semus nois chi lu passigiamus e lu ispainamus cando non respetamus sos òbligos de nos abbarrare in domo e de no atopare gente meda. In atesa de unu vatzinu, s’ùnicu rimèdiu contra su virus, difatis, est su cuntenimentu.

L.M

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.