Fatu fatu a Istanbul “Visioni Sarde”, sa rassigna acumprida cun s’agiudu de sa Fundatzione Sardegna Film Commission, at a pònnere pee in Grètzia. Su programma de projetzione in terra greca, fata in presèntzia pro mesu de sa Retza de Cooperatzione Culturale ìtalu-ellenica e cun sa tèndida de manu de sa Federatzione Natzionale Cineclub de Grètzia, est coordinada dae su Segretàriu Generale de s’Aial, dot. Enzo Bonanno, paris cun sa trasmissione in direta in sa prataforma Shift72.
S’Ambasciada de Itàlia in Grètzia e s’Istitutu Italianu de Cultura de Atene in collaboratzione cun s’AIAL, assòtziu culturale italo-ellènica, ant insertadu is filmados de sa rassigna in s’àmbitu de unu programma articuladu de promotzione de su Tzìnema italianu in Grètzia.
Sa rassigna est istada giai programmada pro sàbadu su 20 de austu in sa terratza de s’Artemis a Platanos, in s’ìsula de Leros, in su cuadru de is seradas de tzìnema a s’abertu prevìdidas pro custa istade.
De grandu importu pro sa resèssida de s’initziativa est istadu su suportu de sa Fundatzione Sardegna Film Commission de sa Regione Autònoma de sa Sardigna e s’assistèntzia tècnica de sa Cineteca de Bologna.
Si tratat de un’ocasione istraordinària pro ammustrare in s’istràngiu, pro mesu de su tzìnema, sas medas caras de sa cultura sarda: istòria e modernidade, paesàgios urbanos e de mare, fantasia e realidade. Milli aspetos e contradditziones furriadas dae is registas in istòrias chi nos agiuant a cumprèndere in manera prus funguda s’ìsula.
Protagonistas de is seradas ant a èssere is giòvanos registas: Alessandra Atzori, Milena Tipaldo (Il Pasquino), Davide Melis (Il volo de Aquilino), Carlo Licheri (L’rtima habanera), Paola Cireddu (L’uomo del mercato), Alice Murgia (Margherita), Sergio Scavio (Marina, Marina!), Michele Francesco Meloni , Giovanni Pintus (Di notte c’erano le stelle) e Roberto Achenza (Un piano perfetto).
Is curtzosmetràgios sunt in limba originale cun sutatìtulos in gregu. Sa rassigna at a èssere disponìbile in Grètzia finas a su 31 de austu 2022.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22 Attività realizzata col contributo della Regione Sardegna – IMPRENTAS 2021-2022. LR 22/2018, art. 22
