Sos operadores agroalimentares ant pedidu a sos camionistas sardos unu coladòrgiu pro is produtos friscos.Unu coladòrgiu pro sa fruta e birdura chi est blocada in sos portos sardos e pro sa mertze chi non podet cròmpere in sa penìsula.
Est custu s’apello de sos 69 operadores de su mercadu Agroalimentare de sa Sardigna mandadu a sos autotrasportadores pro fàghere una corsia preferentziale pro sos produtos friscos, in arribu e in partèntzia dae e pro sa Sardigna.
Puru cumprendende sas protestas legìtimas de sos camionistas – si leghet in una nota – sos grossistas cherent istransire chi sos efetos de s’isciòperu torrent a rùere in manera grae subra de sas aziendas de su cumpartu, giai in manera manna corfidas dae sos rincaros de gasòliu, benzina, energia elètrica e matèrias primas.
“Si sos blocos ant a durare ancora sas dies chi sighint s’ant a arriscare disacatos chi non si podent carculare – ispiegat Giorgio Licheri, diretore de Coagri, s’ente gestore de su mercadu – cun agravos inevitàbiles pro sos consumadores. Torra iscontamus sa chistione de èssere un’ìsula, chi giai penalizat su setore influende pro 10 tzentèsimos a su chilu e chi como diat pòdere galu de prus s’allargare. Sos produtos de fruta e birdura – sighit Licheri – arribbados a crèschida e collidos devent èssere a deretu consumados, pro su mantenimentu de sas propiedades nutritivas chi benint prus pagu si sa mertze benit tenta firma in sos càmion”.
Pro fortuna su mercadu Agroalimentare de sa Sardigna est perfetamente operativu, forte de sas provistas garantidas dae sos produtores locales chi ònnia die cunferint patatas, berduras, ortalìtzias e sa fruta de istajone comente a sos agrùmenes.
“Pro como non b’at farta de produtu – ispiegat su presidente Vincenzo Pisano – ma si registrat una reduida de sas iscortas de sos produtos de importatzione comente a bananas, kiwi e sa fruta esòtica. Custa situatzione pro como no at generadu ispeculatziones subra de sos prètzios. Auguramus si tratet de un’emergèntzia petzi temporànea – concruit Pisano – e cunfiamus in un’atzione forte e intzisiva a banda de sas istitutziones sardas e de su Guvernu pro evitare chi sa giusta protesta de sos camionistas càuset graves disacatos a sas aziendas”.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22 Attività realizzata col contributo della Regione Sardegna – IMPRENTAS 2021-2022. LR 22/2018, art. 22
