Su 19 de martzu sos ativistas ambientalistas de Ultima Generazione si sunt riunidos in assemblea in modalidade populare, est a nàrrere aberta a totu cantos, pro arresonare de crisi econòmica e sotziale e de emergèntzia ìdrica in Sardigna.
S’addòbiu fiat in pratza Costitutzione cun sos ativistas sètzidos a chircu, in terra etotu, pro nch’intrare a fundu de sas duas chistiones inditadas.
«Deo so oe inoghe cun bois – at naradu Marta, 20 annos – ca so istraca de s’indiferèntzia e de su sentidu de impotèntzia chi comente tzitadinos bivimus in sa carena nostra. So istraca de una polìtica chi non nos rapresentat e chi sa boghe nos nche bogat. Nois, cun custa assemblea e non cun custu ebbia, cussa boghe semus leende·nos·la a nou, a bellu a bellu, ca totu cantos nois tenimus su diritu de disinnare in contu de su benidore nostru».
Cunforma a sas modalidades organizativas de sos organizadores, a s’assemblea l’ant mustrada comente un’esèmpiu de democratzia direta (mentovadu s’astensionismu comente indicadore de una polìtica a tesu dae sos bisòngios de sa gente).
Cale sunt sas rechestas de sos de Ultima Generazione? «Unu Fundu de acontzu preventivu, permanente e partetzipadu de nche pònnere annu cun annu in su bilantzu istatale».
E dae ue cheret leadu su dinare? «Dae sos Sussìdios dannàrgios in contu de ambiente (Sad), dae sa tassatzione de sos extra-profetos de sas cumpangias fòssiles, dae sa mèngua de istipèndios, prèmios e benefìtzios a sos manager issoro, dae sos gastos de sa polìtica e dae sos gastos militares».
«Pro custu – serrant – amus a sighire a falare a carrera, a aprontare atziones de disubbidièntzia tzivile e non violenta, pighende·nos sa responsabilidade de sas atziones nostras in cara de sa repressione, de sos tribunales e de sos protzessos».
Ultima Generazione faghet parte de su network A22 e sos militantes locale s’addòbiant cada domìniga a sas 9 de sero (custu su link pro si nche marcare).
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
