S’Einstein Telescope (ET) de Sos Enattos at a faeddare in sardu. S’Istitutu Natzionale de Fìsica Nucleare (Infn) difatis at fatu ischire a sa Regione Sardigna, Servìtziu Limba e Cultura sarda, chi bolet un’agiudu pro iscrìere in limba sarda: custu at a serbire pro ammaniare una setzione noa de su giassu istitutzionale.
Ddu faghet ischire una nota de imprenta de sa Regione. S’assessora de s’Istrutzione Pùblica, Benes Culturales, Informatzione, Ispetàculu e Isport, Ilaria Portas at propostu cun una delìbera, aprovada dae sa Giunta regionale, de sighire cun su progetu gràtzias a s’agiudu de su Isportellu Linguìsticu regionale.
“Semus cuntentos meda de custa rechesta chi arribbat dae su Infn – at naradu s’assessora Portas – pro sa Regione nostra e pro sa limba nostra est una ocasione de importu mannu chi, siat deo chi totu sa Giunta regionale, amus chèrfidu disfrutare. Una limba no est feti una regorta de faeddos. Non semus chistionende de pigare testos e de los torrare a prodùere o furriare in limba sarda. Una limba est una manera de arresonare, est una cultura, e chistit in intro de issa totu s’istòria de chie s’espressat cun cussu limbàgiu. Posca su progetu de su ET giughet in fatu oportunidades mannas a beru pro sas pitzocas e sos pitzocos nostros, in prus de sa balia iscientìfica pro sa fìsica, sa cosmologia e s’astrofìsica”.
S’impitu de sa limba sarda in unu campu iscientìficu de livellu artu meda e aprovadu de manera iscientìfica, sighit su comunicadu, at a permìtere de pònnere sa limba sarda in intro de unu cuntestu de impreu nou e chi nche l’at a ismanniare galu de prus, agiudende non feti a li dare prus importàntzia ma fintzas a nche acumprire sas punnas de legisladura de sa polìtica linguìstica (LR 22/2018).
