«Su progetu Einstein Telescope est una de sas atziones programmàticas prioritàrias de s’amministratzione regionale. Pro custu bi cheret s’organizatzione de una governance interna a prus livellos pro afortire sa candidadura».
Est cosa chi at naradu sa presidente de sa Regione Alessandra Todde dende su via lìbera a s’istitutzione de sa Cabina de regia e dende atuatzione a sa delìbera aprovada su 23 de santugaine de s’annu coladu. Faghent parte de custu organismu sa presidente matessi, is assessores de sa Programmatzione, de sos Afàrios generales, de sos Entes locales, de s’Indùstria, de sos Traballos pùblicos e de su Traballu, is sìndigos de s’àrea progetu (Lùvula, Bitzi, Onanie e Orune).
Ite at a fàghere custa Cabina regia? In programma b’at atziones de coordinamentu pro acumpangiare e gestire, cun miradas polìticas e tècnicas, sas atividades a costàgiu de sa canidadura de su situ de Sos Enattos. «Su de pònnere in parte totu custos assessorados e àteros sugetos istitutzionales – annanghet Todde – dimustrat cantu su progetu de s’Einstein telescope nche bàrighet sas chistiones iscientìficas dende atentzione a su territòriu e a sas possibilidades de isvilupu in totu sas formas suas: dae s’economia a su traballu; dae sas infrastruturas a su welfare; dae sa cultura a s’ambiente».
Pro s’Einstein Telescope sa Regione at giai postu a cùrrere 350 milliones de èuros comente cuota de cumpartetzipatzione cun su ministeru de s’Universidade, 20 milliones pro sos interventos chi ant a pertocare sa ristruturatzione de sa diga Minghetti netzessària pro su megioru de sa gestione de sas risorsas ìdricas de sa zona e s’adeguamentu de s’istrada de intrada a su Tzentru de chircas ET SUnLab, pro parte sua cofinantziadu dae sa Regione cun àteros 10 milliones, chi l’ant a fàghere in s’àrea dell’ex Ri.Mi.Sa.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
