Biddamanna Strisàili s’aprontat a acollire atletas e amantiosos de sa luta traditzionale pro sa de trèighi editzione de “Juntos”, su Torneu Internatzionale de Sa Strumpa, in programma pro chenàbura su 7 de austu de su 2026, dae is 18, in pratza de crèsia. Una manifestatzione chi, annu cun annu, est diventada un’apuntamentu importante pro sa valorizatzione de sa luta traditzionale sarda e pro s’addòbiu tra culturas e disciplinas isportivas chi benint dae diferentes partes de su mundu.
Ammaniada dae s’Asd Sa Strumpa, cun su presidente Antonio Coccoda, cun s’agiudu de su Comitadu Regionale Fijlkam Sardegna, sa gara at a reunire is gherradores sardos e representantes de diferentes traditziones de luta. A custa s’editzione de su 2026 partètzipant atletas dae Iscòtzia, Inghilterra, Bretagna e Islanda, in prus representantes de Iran e Kirghizistan, in unu cunfrontu chi ponet a su tzentru non s’agonismu ebbia, ma fintzas sa connoschèntzia e su cumpartzimentu de patrimònios culturales diferentes.
In is annos colados, “Juntos” at favorèssidu, difatis, s’addòbiu tra Sa Strumpa e àteras formas de luta traditzionale, comente su Backhold iscotzesu e inglesu, su Gouren de sa Bretagna, sa Glíma islandesa, su Ranggeln de s’àrea alpina, sa Lucha Leonesa ispagnola e àteras disciplinas acapiadas a s’istòria e a is traditziones de is comunidades locales.
Su nùmene matessi de sa manifestatzione, “Juntos”, chi bolet nàrrere “in paris”, sintetizat s’ispìritu de s’initziativa: fàghere de sa luta traditzionale un’aina de diàlogu e de atopu tra pòpulos, mantènnere bivas pràticas isportivas chi rapresentant una parte de importu de s’identidade culturale de is territòrios chi partètzipant a sa manifestatzione.
Sa Strumpa est una forma de luta “corpus a corpus” de sa traditzione sarda, difùndida istòricamente in is comunidades pastorales e rurales de sa Sardigna tzentrale, cun una continuidade particulare in Barbagia e in Ogiastra. Dae is annos Otanta, diferentes associatziones ant inghitzadu unu percursu de recuperu, valorizatzione e codìfica de is règulas, permitende a sa disciplina de èssere praticada fintzas comente atividade isportiva organizada. Oe Sa Strumpa est inserida in s’àmbitu federale de sa Fijlkam e sighit a èssere praticada in unas cantas comunidades de Sardigna.
Sa caraterìstica printzipale de sa disciplina est sa s’achirrada obligatòria de cumentzu. Is gherradores, s’afrontant a camba e s’acafant poderende·si a pare: unu bràtzu passat a suta de su suercu de s’aversàriu e s’àteru in sa pala. S’acafada depet èssere mantènnida durante s’atzione e rapresentat unu de is elementos distintivos de sa luta sarda.
S’iscopu est de fàghere pèrdere s’echilìbriu a s’aversàriu e de ddu betare a terra impreende fortza, agilidade e tècnica. Non si podent donare corpos e istrìnghere de osseddu. Binchet su chi in chimbe garas resesset a cassare tres bias su rivale. Fintzas sa capassidade de achirrare sena iscapare s’istrinta est fundamentale: chie dda lassat retzit un’amonimentu e si sighit benit donadu unu puntu a s’aversàriu. Si is gherradores non resessent a si betare a terra, su binchidore si sèberat tenende contu de su brontu e de s’isprenetu mustradu.
S’editzione de su 2026 de “Juntos”cunfirmat fintzas sa voluntade de fàghere sa manifestatzione semper prus inclusiva, cun sa partetzipatzione siat de òmines e siat fèminas de diferentes de etade diferente. Una detzisione custa chi tenet s’iscopu de afortziare sa trasmissione de sa disciplina a is levas noas e de favorèssere sa connoschèntzia de Sa Strumpa fintzas foras de is cuntestos traditzionales.
Is operatziones ufitziales de pesu de is atletes s’ant a fàghere in is locales de s’asilu betzu, in pratza de crèsia. A is 18 ant a cumintzare is disfidas, chi s’ant a concruire cun is premiaztziones ufitziales. Sa manifestatzione s’inserit in su calendàriu de is iniziativas istadiales de Biddamanna Strisàili e rapresentat fintzas un’importante ocasione de promotzione de su territòriu. Sa presèntzia de atletas e delegatziones internatzionales at a fàghere acudire, in prus de is atletas e amantiosos de custu isport, fintzas curiosos e turistas, unende isport, cultura e valorizatzione de is traditziones locales. Difatis, a s’agabbu de su torneo, ddoe at a èssere sa Sagra traditzionale de is Gàthulis, unu momentu de festa e de amighèntzia chi at a cumpletare una die dedicada a s’identidade e a s’ospitalidade ogiastrina.
Àteras manifestatziones dedicadas a Sa Strumpa sunt previstas fintzas in Ollolai.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
