Sighi∙nos

Salude, ite ses chirchende?

Atualidade

Comente sos ex de Autodeterminatzione andant a sas eletziones italianas

Non paret chi b’apat coladu bator annos ebbia, ma meda de prus, dae cando sos de su carrabusu de Autodeterminatzione pariant seguros de nche pòdere brigare su 20% regionale (cando no una vitòria in unu cullègiu uninominale) pro nch’artziare a Roma e pro rapresentare sas punnas de libertade e de autodeterminatzione de sa Sardigna in sa de 18 legisladuras.

Pro seguru calicunu fiat timende·si·los sos efetos de un’atza nòbile ma càrriga de arriscos e comente est finida l’amus bidu totu cantos. Lassende·nche a banda sas eletziones regionales de s’annu a pustis (forsis fiat cussu su momentu pro una projetzione che a sa chi si brujeit su 2018), sa torrada de su 25 de cabudanni pro su rennou de su Parlamentu italianu bidet unas cantas de cussas fortzas partzidas in sa prospetiva. Sardigna natzione nos narat de nos nch’abarrare in domo e de non votare ne a «sos candidados de su “Scegli”» (est a nàrrere su tzentru manca, «vassallos de su Partito Stato»), ne a sos «de su “Credo”» a s’àtera ala, ca nât chi sunt sos «vassallos de chie ti cramat terrone».

A votare b’andant sos de Rossomori chi, cun una nota de sa segretària Lucia Chessa, narant de èssere indiritzados a manca, a cussa manca chi non s’est alleada cun su Pd, duncas no a sa sìndria Verdi / Sinistra italiana. Sa ghia de su partidu atzionista, sotzialista e federalista non mentovat a s’Unione popolare de De Magistris (Potere al popolo, Rifondazione e àteros) ma, comente issa etotu narat torrende risposta a chie li cummentat sa nota sua, non bi cheret «il disegnino» pro lu cumprèndere.

E chi b’apat àteros indipendentistas chi votent a cussa ala lu cumprendimus dae sa nota de LibeRU, formatzione segura chi un’apellu a s’astensione «siat de giudu ebbia a fàghere mancare su votu a sas boghes de contrariedade […] a sas lògicas bellitzistas e anti populares cagiadas in su fronte draghista». E si sos de Irs galu sunt a essire cun boghe pròpia (semper chi lis pàrgiat cosa dèghida), sos cumpàngios issoro de ProgRes (ambos torrados a si nche ghetare a pare in s’esperièntzia Helis! a pustis de annos de disamistade) narant chi su 25 «non cercheremo voti ma cercheremo voi».

Serrende·la, non paret cosa fàtzile, si non connoschende sas positziones individuales de unos cantos ex rapresentantes, sa de cumprèndere sas positziones de sos àteros de su carrabusu. Anthony Muroni a banda, pigadu dae àteras chistiones, non si connoschent faeddos ufitziales de Sardegna possibile, de Comunidades, de Gentes e de s’assòtziu Sardos. A s’àtera borta.

Advertisement. Scroll to continue reading.

Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22

Attività realizzata col contributo della Regione Sardegna – IMPRENTAS 2021-2022. LR 22/2018, art. 22

De lèghere

Polìtica

In Goni, piticu comunu de su Gerrei cun  prus pagu de 500 abitantes, is eletziones comunales si sunt trasformadas in unu casu natzionale. A...

Cultura

Duos podcast noos in limba sarda arribbant pro donare boghe a is istòrias e a is pessonàgios de sa Sardigna: sunt “Postali Blues” e...

Sardigna

In sa note intre s’8 e su 9 de làmpadas, Sandro Arzu, 56 annos de Àrthana, s’est mortu a manu sua in sa galera...

Sardigna

Sa Sardigna in su 2024 sighit sa crèschida econòmica cumintzada in su 2018 e firmada isceti in su 2020 dae sa pandemia de su Covid. Creschent Pil...