Torrat a Tàtari sa Note Europea de sos Chircadores e de sas Chircadoras, un’eventu de grandu importu internatzionale in programma pro su 27 de cabudanni. S’initziativa, chi interessat medas tzitades italianas in intro de su progetu SHARPER (SHAring Researchers’ Passion for Education and Rights), sustentadu dae sa Cummissione Europea, punnat a promòvere s’addòbiu intre su mundu de sa chirca e sa tzitadinàntzia
In s’Universidade de Tàtari, sas fainas ant a cumintzare giai dae lunis su 23 de cabudanni e ant a sighire finas a su 27. A s’eventu ant a pigare parte prus de 1.000 chircadores e chircadoras in 15 tzitades italianas. S’initziativa est intregada mescamente a sos istudiantes de sas iscolas mèdias, cun unu programma prenu de laboratòrios, cunferèntzias e fainas interativas. Pro pòdere partetzipare est a iscrìere a s’indiritzu de curreu eletrònicu terzamissione@uniss.it.
Sa die printzipale de sa manifestatzione est sa de chenàbura su 27 de cabudanni, de sas 9:00 a sas 21:30, in su Padiglione Tavolara de Tàtari. S’inauguratzione ufitziale at a èssere a sas 9:00 in su Salone de sas Espositziones, cun sos interventos de su Retore Gavino Mariotti e de su Sìndigu Giuseppe Mascia.
Sa die etotu ant at a printzipiare s’atividade a tìtulu “ScienzArena“, cun espositziones sientìficas e laboratòrios interativos contivigiados dae sos 10 dipartimentos de s’Ateneu e de sos collaboradores de SHARPER Sassari, Fundatzione AIRC, s’Istitutu Zooprofilàticu Isperimentale e s’Acadèmia de Bellas Artes “M. Sironi“. Su mangianu at a èssere dedicadu a sas iscolas, mentras a merie ant pòdere partetzipare fintzas sas famìlias e su pùblicu.
In su Padiglione Tavolara etotu, dae sas 9:30 a sas 19:30, s’apuntamentu est cun “UnissPlay!”, un’initziativa dedicada a sos giogos lògicos e matemàticos, acanta chircadores e operadores lùdicos ant a ghiare sos partetzipantes in sas vàrias fainas.
Prevìdidos fintzas unos cantos eventos in totu su Nord Sardigna chi ant a antitzipare su printzipale de su 27 de cabudanni. In Terranoa, su 23 de cabudanni, est in programma su seminàriu “Il silenzio di Sos Enattos per capire la Terra e l’Universo” acanta su Cunsòrtziu Polo Universitàriu, mentras su 24 de cabudanni sunt prevìdisos addòbios cun sos istudiantes de sos litzeos sientìficos e clàssicos de sa tzitade.
Su 24 cabudanni, in Tàtari, ant a èssere interessadas sas iscolas, cun bìsitas ghiadas a su Museu sientìficu MUNISS e a s’Ortu Botànicu, mentras su 25 cabudanni est in programma una “Non conferenza sull’Einstein Telescope” in su Teatru Astra. Su 25 etotu, in Tèmpiu, s’at a tènnere sa rapresentatzione teatrale de “La Tempesta” de William Shakespeare, concrusione de su progetu culturale LiberArte, cuncordadu cun su Polo Universitàriu Penitentziàriu.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
