Una die de festa intre traditzione, mùsica e cultura pro onorare mesu sèculu de folclore
Su 28 cabudanni, Àrthana at a èssere su palcoscènicu de una festa populare manna pro tzelebrare su de 50 anniversàrios de su grupu folk Abba Frida. Fundadu in su 1974, su grupu rapresentat una de sas realidades culturales prus betzas de sa bidda e de s’Ogliastra, chi cun orgòlliu portat a in antis sa traditzione e s’identidade locale. Generatziones de balladores e balladoras s’ant donadu su càmbiu pro poderare bia sa passione pro su folklore, s’atacamentu a su bestire traditzionale e s’amore pro sa cultura sarda.
In ocasione de custu importante traguardu, su 28 de cabudanni, sa manifestazione “Àrthana in Folk” at a bìdere sa partetzipatzione de grupos de totu s’ìsula e de figuras importantes de su panorama folclorìsticu regionale. S’eventu, organizadu cun sa collaboratzione de s’Unione Folklorica Sarda, de s’Unione Folklorica Italiana e de su Comunu de Àrthana, at a ofèrrere unu programma presu de ispàssiu, ballos, mùsica e de ispetàculu. Custu est su programa cumpletu:
A sas 10:45 – Presentada de s’album fotogràficu “I nostri primi 50 anni”
In sa sala consiliare de su Comunu de Àrthana in bia de Mons. Virgilio, s’at a presentare s’album fotogràficu chi contat s’istòria de su grupu folk Abba Frida. A s’eventu ant a partetzipare su sìndigu Angelo Stochino, s’amministratzione comunale, su presidente de s’UNPLI Raffaelangelo Sestu, su presidente de s’UFS Lino Cordella e de s’UFI Mino Meloni.
A sas 18:00 – Parada de sos grupos folclorìsticos
Dae Pratza de sos Mortos in Gherra, at a mòvere una parada colorada de grupos folk, chi at a colare in su tzentru de Àrthana finas a Pratza de Roma cun ballos e mùsica.
A sas 18:30 – Esibitzione de sos grupos folclorìsticos
Presentados dae Giuliano Marongiu, ant a pigare in su palcu de Pratza de Roma su grupu folk Abba Frida de Àrthana, paris cun sos grupos de Lanusè Cultura e Folklore, Bidda Sorris S. Biagio, Ovodda Orohole, Assèmini S. Pietro e su coro Logudoro de Ùsini.
A sas 20:00 – Cùmbidu pro totu sa populatzione
A s’acabbu de sas esibitziones, su grupu Abba Frida at cumbidare a papare e a bufare totu sos partetzipantes.
A sas 21:30 – Ispetàculu musicale cun Giuliano Marongiu e sos Dilliriàna
Sa serada s’at a concruire cun un’ispetàculu musicale chi at a bìdere protagonista Giuliano Marongiu e su grupu Dilliriàna, pro festare in mùsica custu anniversàriu importante.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
